2014, ഫെബ്രുവരി 24, തിങ്കളാഴ്‌ച

നീ പണ്ട് നന്നേ മെലിഞ്ഞിട്ടായിരുന്നു .
ഓടിയും നടന്നും കാൽനനച്ച് അക്കരെ സ്‌കൂളിൽ പോയിരുന്ന,
അച്ഛന്റെ ബാല്യത്തെക്കുറിച്ച് പറഞ്ഞുകേട്ടിട്ടുണ്ട് .
കുളിക്കടവിലെ മണ്‍പടവിലൂടിറങ്ങി മുങ്ങിയും നീന്തിയും
ആർത്തുല്ലസിച്ചു എന്റെ ബാല്യകാലം .
കുളിക്കടവ് നഷ്ടപ്പെട്ട് , തുഴകൾ ബാക്കിവച്ചുപോയ കരയിൽ
എന്റെ വിരലുകളിൽ മുറുകെപ്പിടിച്ച്‌ ,നിന്നെ നോക്കിനിന്നു എന്റെ
കുട്ടികളുടെ ബാല്യം .
നെഞ്ചകത്തിൽ ആഴത്തിൽ മുറിവുകളുമായി , കാണുന്നതൊക്കെ
നിഴലായൊതുക്കി നെഞ്ചുവിരിച്ച് നീ കിടക്കുന്നിടത്ത് ഞാനിതാ വീണ്ടും.
നിർത്തിയിടത്തുനിന്ന് തുടങ്ങി എന്റെ മനസ്സിനെ വീണ്ടും
പൂർണനഗ്നയാക്കി ഒരിക്കൽക്കൂടി സമർപ്പണം.

കണ്ണുചിമ്മാൻ എനിക്കൊരു നക്ഷത്രമാകണ്ട .
പ്രണയത്തിൽ എന്നിലെയെന്നെ നഷ്ടമാകുന്നതുപോലെ നിന്റെ
നനവിൽ ,കണ്ണിമവെട്ടാതെ എനിക്ക് മാനം നോക്കിക്കിടക്കണം .
എല്ലാ നക്ഷത്രങ്ങൾക്കും ഒരേ മുഖമാണെന്ന് നീ പറയും .ഓരോ
നക്ഷത്രങ്ങളെയും ഓരോ പേരുചൊല്ലി വിളിച്ച് ഞാൻ നിന്നെ
തോൽപ്പിക്കും . ഒടുവിൽ ഒരേ പേരുതന്നെ അങ്ങോട്ടുമിങ്ങോട്ടും
വിളിച്ച് നമ്മൾ പൊട്ടിച്ചിരിക്കും .




2014, ഫെബ്രുവരി 4, ചൊവ്വാഴ്ച


ഇവൾ , സുന്ദരി ...
ആദ്യമായി കാണുമ്പോൾ ഇവൾ അനാരോഗ്യ .  ഉടലിന്
ഒരുയിരല്ലാതെ , ആകർഷകമായി ഒന്നും കിട്ടാതെപോയവൾ
ഈ രണ്ടു ഗുണങ്ങളാൽ കൂടുതൽ സ്നേഹിക്കാൻ പ്രേരിപ്പിച്ചവൾ
പരിചരണം ഉറപ്പുവരുത്തി ,അമ്മയാൽ ഉപേക്ഷിക്കപ്പെട്ടവൾ 
സുന്ദരീ'ന്നുള്ള വിളി കേട്ടുകേട്ട്  ശരിക്കും സുന്ദരിയായിത്തീർന്നവൾ
സംഭവബഹുലമായ ഒരു   ജീവിതം, കുറച്ചുനാളുകൾ കൊണ്ട്
പൂർത്തിയാക്കി ,  ഒരു പുലർച്ചെ , ഒരു ശ്വാസം ബാക്കിവച്ച് ,
ആദ്യമായ് രുചിച്ച മധുരത്തിനായി കാത്തുകിടന്ന് , ഒറ്റത്തുള്ളിയിൽ
അവസാനദാഹം നുണഞ്ഞ് ,കണ്‍മുന്നിൽ മരണപ്പെട്ടവൾ .
ഒരു വയസ്സ് തികയാതെ കടന്നുപോയവളുടെ ഓർമയ്ക്കൊരു വയസ്സ് ..!