എത്രയോവട്ടം 

അടിച്ചുവാരിത്തളിച്ചു. 

മാഞ്ഞുപോകുന്നില്ല, 

പറന്നുപോയൊരു പാട്ടിന്റെ 

നിഴൽ. 

ഓരോ മൺതരിയിലും 

ഇടമുറിയാതുയരുന്നുണ്ട് 

നനഞ്ഞ തൂവലിന്റെ പിടച്ചിൽ. 

നിലാവിനെന്തിത്ര

നിലാവെന്ന് 

ഇലമറവിലൊളിച്ചിരുന്ന്

കുശുമ്പു പറയുന്നിരുട്ട്.

അറിഞ്ഞു വിളമ്പണം 

നാളെയെന്ന് 

ആകാശത്തിനോടൊരു 

പയ്യാരം. 

വിളക്കുകത്തിയപോൽ 

പരന്ന വെളിച്ചത്തിൽ 

എങ്ങനെ മുങ്ങിനിവരാനെന്ന് 

ഇന്നലെ ഏതോ ഒരു കിളി 

മറന്നുവെച്ച പാട്ടിനോട് 

വിസ്തരിക്കുന്നവൾ, 

പുഴ കേൾക്കാനെന്നവിധം.

'ഇരുട്ടേ'ന്ന് വിളിച്ചോടിവരുന്ന

കാറ്റിന്റെ ചില്ലകൾ തട്ടി 

മുറിയാതെ ചിന്താതെ

ആ പേര് പൊതിഞ്ഞുപിടിക്കുന്നു 

നിലാവിന്റെ ചേലത്തുമ്പാൽ

വെളിച്ചപ്പെട്ട ഇരുട്ട്..!

ജനലിനപ്പുറമൊരു 

വിശാലമായ മുറ്റമുണ്ട്

ഞാൻ 

നനച്ചുവളർത്തിയത് 

പൂക്കളുണ്ട് 

ശലഭങ്ങളുണ്ട് 

കിളികളുണ്ട് 

കൊഞ്ചിക്കാൻ കാറ്റുമുണ്ട് 

കയ്യെത്തുംദൂരത്ത് പെയ്യുന്നു 

നനുനനുത്ത മഴ 

തൊടാനാവുന്നില്ലെങ്കിലും 

അറിയാനാവുന്നുണ്ട് 

ഉള്ളം കുളിർക്കുന്ന തണുപ്പ് 

കാണാമറയത്തിരുന്ന് 

നീയെന്നെ തൊടുന്നതുപോലെ. 

കുളിരുപുതപ്പ് 

നന്നായ് മടക്കിവെച്ച് 

നടക്കാനിറങ്ങുന്നു 

രാത്രി.

ഇടവഴിനീളേ

തളർന്നുറങ്ങുന്നു

കൂട്ടമായും ഒറ്റതിരിഞ്ഞും

പല പ്രായത്തിലുള്ള 

നിഴലുകൾ.

ഒതുക്കുകല്ലുകളുടെ 

കയറ്റത്തിനൊടുവിൽ  

പഴയൊരു വീടിന്റെ പൂമുഖം. 

കത്തിച്ചുവെച്ചിരിക്കുന്ന 

റാന്തലിനു ചുറ്റും

തുള്ളിച്ചാടി ആത്മഹത്യചെയ്ത 

ഈയാംപാറ്റകളുടെ 

മരിച്ചിട്ടും ശവമാകാത്ത 

ശരീരങ്ങൾ.

തുറന്നുകിടക്കുന്ന വലിയ 

മരവാതിൽ.

താളംമുറിയാത്ത 

സമയസൂചികളുടെ 

ചുവര്.

വരച്ചുവെച്ചിരിക്കുന്ന 

ഛായാചിത്രങ്ങളിൽ

മരിച്ചുപോയവരുടെ മായാത്ത 

ചിരി.

ചാറ്റൽമഴയുടെ വിരിയിട്ട 

മേശമേൽ 

മൂടിയുള്ളൊരു മൺപാത്രം.

നിറച്ചുവെച്ചിട്ടുണ്ടതിൽ 

പാകമായ് പഴുത്ത വാക്കുകളുടെ 

മധുരം. 

ഉള്ളം നിറച്ചെടുത്ത്

ഒതുക്കുകളിറങ്ങുന്നവളുടെ  വിരലുകളുരുമ്മി 

കട്ടെടുത്തിട്ടില്ലെന്നു ചിരിച്ച്

പറന്നു മറയുന്നു കാറ്റ്.

ഉള്ളകത്ത് 

തോർന്നിട്ടില്ലിതുവരെ, 

കുടയെടുക്കാതെ

വിരുന്നുവന്ന് 

പുരനിറച്ചുപോയൊരു 

പെരുമഴക്കാലം.

മെഴുകിമിനുക്കിയ നിലത്ത്

കാറ്റുമ്മവെച്ചിടങ്ങളിലൂടെ 

തെളിഞ്ഞുവരും 

ഒരുനൂറ് സൂര്യന്മാർ. 

ഇരുളുമ്പൊഴും വെളിച്ചമാണുളളിൽ, 

കനലെരിയുന്നതിന്റെ. 

പലരോടും

പറഞ്ഞിരുന്നു 

പല പല നേരങ്ങളിൽ,

മരിക്കുമ്പൊ കരയരുതെന്ന്. 

കേട്ടും കണ്ടുമറിഞ്ഞ ചിരി 

ഓർത്തെടുത്ത് പടർത്തണമെന്ന്. 

പറഞ്ഞിരുന്നു 

നോക്കിനിൽക്കരുതെന്ന് 

ചോരവറ്റിയ 

ചുണ്ടുകളിലേക്കും 

നിറംമങ്ങിയ  

വിരൽനഖങ്ങളിലേക്കും.

കാണുന്നുണ്ട് 

അടുക്കളച്ചുവരിൽ 

രണ്ടു നേർത്ത ജലരേഖകൾ.

സാരിത്തലപ്പുകൊണ്ടത് 

തുടച്ചുകൊടുക്കുന്ന, 

എന്റെയതേ ജന്മനക്ഷത്രമുള്ള 

ഒരുവളെയും. 

പറഞ്ഞിരുന്നതാണ് 

ഊട്ടിനിറച്ച രുചിഭേദങ്ങളോട്.....

ഒരു ചിരിയിലൂടെനിക്ക് തിരിച്ചുപോകണം

വിയർത്ത് 

വീണ്ടും വിയർത്ത് 

കുളിക്കാനിറങ്ങുന്നു, 

വറണ്ട ഇടവഴിയിലൂടെ 

വറ്റിയ കടവിലേക്ക് 

പാട്ട് മറന്ന രാവ്.

വിരലുകൾ നീട്ടി 

ഗർഭത്തിൽനിന്നിനിയും 

പുറത്തേക്കുവരാത്ത 

തണുപ്പിന്റെ കുഞ്ഞുങ്ങളെയും 

കാത്തുകാത്ത് 

തളർന്നുകിടക്കുന്നു 

വഴിയോരത്ത് 

പാമ്പുകളെപ്പോലെ

കെട്ടുപിണഞ്ഞ  നിഴലുകൾ. 

രാവിനു തെളിയാൻ 

ഇത്തിരിപ്പോന്ന 

ജലത്തിന്റെ പള്ളയിലേക്ക് 

ചൂട്ടുകത്തിച്ചുപിടിക്കുന്നു 

ആകാശം 

ചിതറിവീഴുന്നു വെളിച്ചത്തിന്റെ 

പൊട്ടുകൾ. 

നാളെ നാളെയെന്ന് 

ചിറകടിച്ച് പറന്നുപോകുന്നു 

കിനാവിലൊരു രാക്കിളിക്കൂട്ടം. 

വരൂ'  

സമയമായ് 

വിളിക്കുന്നു മഹാരഥൻ 

ഒടിക്കുന്നു നാരായമുന 

മുറിക്കുന്നെൻ വിരൽത്തുമ്പും.

ആകാശത്തെ 

മുറ്റത്തേയ്ക്കഴിച്ചുകെട്ടി 

നക്ഷത്രക്കുഞ്ഞുങ്ങളെ 

മാമൂട്ടി, പാടിയുറക്കി 

ഞാനെന്റെ കണ്ണുകളെ മേയാൻ

വിടുന്നു. 

ഇരുട്ടിൻപറ്റങ്ങൾ 

ചവിട്ടിമെതിച്ചിട്ടയിടങ്ങളിൽ 

മുളച്ചുവന്നേക്കുമൊരുപക്ഷേ 

എന്നോ വേരറ്റുപോയൊരു മഴയിൽ-

കുതിർന്ന

വാക്കിന്റെ വിത്തുകൾ.

വെയിലുരുക്കുന്നു പൊന്നരഞ്ഞാണം

മണികൾ കെട്ടിയൊരുക്കുന്നു നേർമഴ 

എന്തുചേലെന്ന് മാമരക്കൊമ്പത്ത് 

ചാഞ്ഞുറങ്ങാൻ തുടങ്ങുന്നു കാറ്റ്.

ഉത്സവത്തിന് 

പുത്തനുടയാടയില്ലാഞ്ഞ്

അത്താഴമുണ്ണാതെ 

മുടിവാരിക്കെട്ടാതെ 

കരഞ്ഞ്

പെയ്യുന്നു

കരിങ്കുഴലി. 

കൊതിച്ചതാണവൾ 

നാലാള് കാൺകെ

നിറഞ്ഞ്

പെയ്യാൻ

വെട്ടിത്തിളങ്ങുന്ന

പുരം തിളക്കുന്ന  

കുളിര് ചൂഴുന്ന

നിലാവണിക്കുപ്പായം.

മുടിപ്പിന്നൽ 

മുന്നിലേയ്ക്കെടുത്തിട്ട് 

നേർത്തവിരലുകൾ

മീ....ട്ടി 

തിരുകിവെച്ചത്

മിനുക്കിവെയ്ക്കുന്നു 

രാവ്.

നിലാവുമ്മവെച്ചിടങ്ങൾ

തിണർത്തുവരുന്നതാണത്രേ 

വെള്ളനിറമുള്ള പൂമൊട്ടുകൾ.

 

ചിരിക്കും കരയും 

കിനാവിലെന്നപോലെ. 

നെഞ്ചിനുമീതെ 

വിടർത്തിവെച്ചിരിക്കുന്ന 

വിരലുകളിൽ നീ താളമിടും,

ഒരു പിഞ്ചുകുഞ്ഞിനെ

ഉറക്കുന്നതുപോലെ.

പിടിവിടാനാവാത്തവിധം 

ഞാൻ നിന്റെ ചൂണ്ടുവിരൽ 

എന്റെ നാഴികമണിയുടെ 

ചാവിയെന്നപോലെ 

മുറുക്കിപ്പിടിക്കും. 

നീയിങ്ങനെ 

നോക്കിയിരിക്കുമെന്നു-

റപ്പുള്ളതുകൊണ്ടു മാത്രമാണ്

ഞാനെന്നെയിങ്ങനെയുറക്കുന്നത്. 

കണ്ണുകൊണ്ട്  

ആകാശം തൊട്ട്

ഒഴുകുന്നത് പുഴയല്ലെന്ന് 

വരച്ചുവെക്കുന്നു ജലം,

അതിന്റെ 

മെലിഞ്ഞ വിരലുകളാൽ.

അവളെ

മടിയിൽക്കിടത്തി 

വരണ്ട ചുണ്ടിൽ 

കിനാവുചുരത്തുന്നു നിലാവ്,

രാവറിയാതെ..കാറ്ററിയാതെ. 

നീ പാടിയ ചില്ലയിൽ സദാ 
വെയിലേറ്റു കരിഞ്ഞു ഞാനിതാ
മറുവാക്കു ചൊല്ലുവാൻ പ്രിയം
മുറിവേറ്റു തകർന്നു രാഗവും.

നിറയെ കുളിർപൂത്ത സന്ധ്യയിൽ
ഉണരും താരകമേട പൂകി നാം
തിരി കത്തിച്ചു തിരിച്ചു പോന്നിടം
ഉയിരിൽ അണയാതെ കാത്തിടാം. 

പതിവുപോലെ 

വേലിനിറയെ പൂത്ത 

ചെമ്പരത്തിക്കാടുകൾ 

വകഞ്ഞുമാറ്റി അവളെത്തി. 

മുറ്റം കടന്ന് 

ഒച്ചയുണ്ടാക്കാതെ 

ജനലരികത്തേയ്ക്ക്.

മുട്ടിവിളിച്ച്

ആരുമില്ലെന്നുറപ്പാക്കി 

അഴികളിലൂടകത്ത്. 

ഞങ്ങളെഴുതാനിരുന്നു. 

പതിവുപോലെ.

മേലാകെ ഇരുട്ടെടുത്തണിഞ്ഞ 

അവൾ തൊട്ടെഴുതിയാൽ 

കൺമഷി എന്റെ കവിളാകെ 

പടരുമെന്ന്.

അവൾ തുടങ്ങി,

എന്റെ വിരലുകൾ കടമെടുത്ത്.

എന്തൊരു ചേലാണ് നിനക്കെന്ന് 

ഒരു പകലോ 

എന്റെ ചുവരിലെ കണ്ണാടിയോ 

പറഞ്ഞിട്ടില്ലിതേവരെ.

പുരപെയ്തൊലിച്ചതാ-

ണകത്തെ മൺകലം 

തുളുമ്പി മറിയുന്ന 

തെറിച്ചവൻമഴ.

കോർത്തെടുത്തൊരു 

പഴുത്തിലക്കൂട്ട-

മെടുത്തടയ്ക്കണമത് 

വെയിൽച്ചുണ്ടെടുക്കാതെ.

വിണ്ടുകീറിയ 

മണ്ണടരുകൾ 

പെറുക്കിയെടുത്ത് 

അടുപ്പുകൂട്ടുന്നു വേനൽ

കനലൂതുന്നു കാറ്റ്

വെന്ത മൺചട്ടിയിൽ 

തിളച്ചു കുറുകുന്നു

ജനാലക്കപ്പുറം

കണ്ണെത്തുംദൂരത്ത്

ഞാനുണർത്തിവിട്ട തിരകൾ 

കെട്ടിയിട്ട വള്ളം 

ചാരിവെച്ച തുഴ 

അതിൽ 

ഞാനഴിച്ചുവെച്ച പാട്ട്

രാവറിയാതെ 

നിലാവുറിയിലുറുമ്പെടുക്കാതെ 

ഞാനടച്ചുവെച്ച കിനാവുകൾ.

പണ്ടു പണ്ട്

വളരേ പണ്ടൊരിക്കൽ

പുൽപ്പായ നീട്ടിവിരിച്ചിട്ടിരുന്ന് 

(ഞാൻ)

നേരിയ വെട്ടം തൊട്ട്

പേന തുറന്നുപിടിച്ച് 

കടല് നിറച്ച് 

തിരിച്ചും മറിച്ചും

ആകാശമെന്നെഴുതാനെടുത്ത- 

നേരം.

കാറ്റിന് കലിയിളകി.

മണല് പറന്നുകളിച്ചു.

കൂട്ടംതെറ്റി നക്ഷത്രങ്ങൾ.

കാൽവഴുതിവീഴാതെ

അവർ

മേഘച്ചീളുകൾ കടന്ന്

ചാടിവന്നൊളിച്ചത് 

മീനുകളുടെ കണ്ണിൽ.

തിരക്കിട്ടോടിവന്ന പകൽ  

അവരെ കണ്ടെടുത്ത്  

ഒക്കത്തിരുത്തി 

കൊണ്ടുപോയതിൽപ്പിന്നെ

മീനുകളൊന്നും കണ്ണടച്ചുറങ്ങീട്ടില്ല.!

ഞാനുമതേ............

മുഷിഞ്ഞ രാവിന്റെ കറുത്ത കമ്പളം 

നിലാവലക്കല്ലിലലക്കി വെച്ചിട്ട് 

നനുത്ത പൂഞ്ചേലയഴകിനാൽ ചുറ്റി

വെളിച്ചം തൊട്ടങ്ങ് മഷിയെഴുതണം.

മിഴി നട്ട് കരിഞ്ഞൊരു പെണ്ണിന് 

മഴയെന്ന് വരച്ച് കിളിർക്കാൻ 

മലമേട്ടിലിരുന്നൊരു കനവ്

നിറക്കുപ്പി മറിക്കണ്...കണ്ടാ.!!

വിളിക്കുമ്പൊ 

ഓടിവന്ന് മുന്നിൽ നിക്കും.

അവളുടെ വിരൽ 

പതിയുമ്പൊ 

തലമുടിയിഴകൾ, 

കാറ്റിനെയഴിച്ചുവിട്ട് 

ഒതുങ്ങിക്കിടക്കും.

കണ്ണുകൾ, 

കണ്ടിട്ടില്ലാത്ത 

ഒരു സ്വപ്നത്തിലേക്ക് 

ആ വിരലുകൾക്കൊപ്പം 

പതിയെ നീന്താൻ 

തുടങ്ങും.

ചുണ്ടുകൾ, 

ഒരു പൂവ് 

അത്രയുമത്രയും 

മനോഹാരിതയോടെ 

ആ വിരൽത്തുമ്പിൽ  

വിടരുന്നതുപോലെയും.

 

മരിച്ചവളുടെ 

വിരലുകൾക്കെന്തൊരു തണുപ്പാണ്.

ഒര് 

കിനാവെടുത്ത് 

രാത്രിയെ 

തുഴഞ്ഞു തുഴഞ്ഞ് 

മറുകരയെത്തിച്ച്,

കടവിലൊറ്റക്കിരിക്കുന്ന

പകലിന്റെ 

കുപ്പായമഴിച്ചുമാറ്റി 

ചൂടുകായാനിരുത്തി,

വെയിലിന്റെ വിയർപ്പാറ്റി 

കഞ്ഞി പകർന്ന്,

സിന്ധൂരച്ചെപ്പിൽ-

നിന്നൊരു നുള്ളെടുത്ത്

ആകെ ചുവന്ന്,

വീണ്ടുമൊരു കിനാപ്പെയ്ത്തിനെ 

കിനാവുകണ്ട്......................

മുറ്റത്തു നിക്കുന്ന-

മാവിന്റെ കൊമ്പില് 

പൊതിഞ്ഞുവെച്ചിരുന്ന- 

കാറ്റിനെ 

ആരോ 

അഴിച്ചെടുത്തിരിക്കുന്നു.

കൂടെയുണ്ടായിരുന്ന 

മണങ്ങൾ 

വഴി മറന്നിട്ടാവും 

പൂക്കളുടെ നെറുകയിൽ 

പറ്റിപ്പിടിച്ചിരിപ്പുണ്ട്.

അവളറിഞ്ഞിട്ടുണ്ടാവില്ല.

കറുത്ത കുപ്പായങ്ങളും 

തുന്നിക്കൂട്ടിയെടുത്ത് 

പോയിട്ടുണ്ടവൾ,

മേഘങ്ങളെയണിയിച്ച് 

അവരെ കൂടുതുറന്നുവിടാൻ.

അവൾ.......

പണ്ടേക്കു പണ്ടേ

മഴതീണ്ടി മരണപ്പെട്ടതാത്രെ.

നിലാവിന്

ഇത്രയും ഭംഗിയായി 

ചിരി വരച്ചതാരായിരിക്കും 

അവളല്ല 

അവൾ.......

രാത്രിക്ക് കണ്ണെഴുതുന്നവൾ,

പണ്ടേക്കു പണ്ടേ 

വെയില് തീണ്ടി തീപ്പെട്ടവൾ.

നിലത്തുകിടന്ന്

അവളുറങ്ങുന്നു,

ഉയർന്നുതാഴുന്ന ഒച്ചകൾക്ക്

നടുവിൽ 

ഒരു ശ്വാസംകൊണ്ടുപോലും

ഉറക്കത്തെയുണർത്താതെ.

ഒച്ചവെക്കുന്നേരം 

തെല്ലിട അടുക്കളയെ 

ഒക്കത്തുനിന്നടർത്തിവെച്ച് 

ജനലഴികളിൽ ചേർന്നുനിന്ന് 

അത്രയും പ്രണയാർദ്രമായ് 

അവളെന്തോ......

വെയിലറിയാതെ 

വിയർപ്പുമണികളൊന്നൊന്നായ് 

പെറുക്കിയെടുക്കുമ്പൊ

ഒരു പൂവടരുന്ന ഒച്ചയിൽ 

അവളെന്തോ.....

കാണാതിരുന്നാൽ 

ഇലയനക്കങ്ങളിൽ കണ്ണുംനട്ട് 

ആരോടെന്നില്ലാതെ

അവളെന്തോ.....

പൂക്കളെയുറക്കുന്നേരം 

ചേലയൊന്നു പിടിച്ചുവലിച്ചാൽ 

ചുണ്ടത്ത് വിരൽവെച്ച് 

അവളെന്തോ.....

രാവുറങ്ങുന്നേരത്ത് 

ജനാലകളടയ്ക്കുമ്പൊ 

ആരും കേൾക്കാതെന്നോട് 

അവളെന്തോ.....

അത്രമേലത്രമേൽ വാചാലമായിരുന്നു 

മൗനംകൊണ്ടെഴുതിയിരുന്ന

ആ കവിതകൾ.

നിഴലിനെ പിടിച്ച് 

കുറ്റിയിൽ കെട്ടിയിട്ട് 

പയ്യിനേം പിടിച്ചോണ്ട്,

പയ്യോ കാറ്റോ ചവിട്ടിമെതിച്ചതെന്നറിയാത്ത-

പുൽക്കൊടികളുടെ 

ഞരക്കത്തിനു മീതേ നടക്കെ, 

ആത്മഹത്യ ചെയ്തൊരു മഴത്തുള്ളി 

മരച്ചില്ലയിൽനിന്ന് 

ഉച്ചിയിൽത്തന്നെ വീണു ചിതറി.

ദൂരെനിന്നോടിവന്നൊരു- 

വെളിച്ചത്തിന്റെ പൊട്ട് 

സ്ഥാനംതെറ്റാതെ നെറ്റിയിൽവന്നിരിപ്പായി.

നാളെ നാളെയെന്നെന്തോ 

മന്ത്രിക്കുന്നതുപോലെ.

കയറില്ലാത്ത കൈവെള്ളയിൽ

മായാതെ നീലിച്ച തഴമ്പ്.

വീടണഞ്ഞിട്ടുണ്ടാവുമിപ്പൊ പയ്യ്. 

മുറ്റം മഷിയെഴുതാൻ

തുടങ്ങിയിരിക്കുന്നു.

കത്തിച്ചുവെച്ച വിളക്ക്

വെളിച്ചമഴിച്ചുടുത്ത് പുഴയിലിറങ്ങി 

കുളിച്ച് തുടിച്ച് രസിപ്പാണ്.

രാവ് കനക്കുംമുമ്പേ 

ഞാനൊന്നു വേഗം മുങ്ങിനിവരട്ടെ.

കരിയിലയിൽ

മഞ്ഞുതുളളികൾ 

താളമിടുന്നതിന്റെ ഒച്ച.

ചെവിയോർക്കെ കേൾക്കാം 

പച്ചയായൊരോർമ്മയിൽ  

മണ്ണ് തളിരിടുന്നതിന്റെ രാഗം.

നിന്റെ വിരലുകൾ 

എന്റെ പിൻകഴുത്തിൽ 

നേർരേഖകൾ വരയ്ക്കുമ്പോൾ 

എന്റെ വിരലുകൾ 

വരയ്ക്കുന്ന നേർരേഖകൾ 

പാമ്പുകളെപ്പോലെ മുറ്റത്ത് 

കെട്ടുപിണഞ്ഞ് ഇഴയാൻ തുടങ്ങും.

ചാഞ്ഞുകിടക്കുന്ന കൊമ്പിലേക്ക് 

പേടിച്ചരണ്ട കലപിലകൾ 

ചാടിക്കയറും.

പച്ചയിലകളിലേക്ക് 

നിറങ്ങൾ മുഖംമറയ്ക്കും.

പാട്ടൊഴിഞ്ഞ കിളിമരം 

പറക്കാനാവില്ലല്ലോന്ന് നിശ്വസിക്കും.

നീട്ടിപ്പിടിച്ചുവെച്ച തല,

തൊഴുത്ത് 

പൂർവ്വസ്ഥിതിയിലേക്കു മടക്കും.

കൊത്തിരസിച്ച്,

കൂവാൻ മറന്ന കൂട് 

തലകൾ പുറത്തേക്കിട്ട് രഹസ്യം

ചികയും.

വെളുത്ത മൂക്കുത്തി കുടഞ്ഞെറിഞ്ഞ്

മുക്കുറ്റിച്ചെടി തലതാഴ്ത്തിനിൽക്കും.

മറച്ചുപിടിക്കാൻ

ഒരു സാരിത്തലപ്പു മതിയെന്നിരിക്കെ

ഞാനെന്താണിങ്ങനെ.....?

നിനക്ക് വഴിയൊരുക്കാൻ

കിണറ്റിൻകരെ നിൽക്കുന്ന വരിക്ക- 

പ്ലാവിന്റെ   ഒരു ചില്ല മുറിച്ചുമാറ്റിയിട്ടുണ്ട്.

(പെരും നുണയാണെ,

ഒറ്റയ്ക്കൊന്ന് മുറ്റത്തേയ്ക്കിറങ്ങി

നടക്കാൻ കൊതിയായിട്ട് വയ്യ.)

നിന്റെ കൈക്കുള്ളിൽ, 

ആ ചൂടിൽ,

നീ ചെറുതായെന്നെ 

മുകളിലേയ്ക്കുയർത്തുമ്പോൾ 

ആകാശമെനിക്കായ് 

താഴ്ന്നിറങ്ങും.

ചിറകില്ലാന്നോർക്കാതെ 

മേഘങ്ങൾക്കിടയിലൂടെ 

ഞാനപ്പൊ പറക്കാനും.

പൊടുന്നനെ,

പൊടുന്നനെ അടർന്ന് 

നിന്റെ കൈക്കുള്ളിലേക്ക്.

അരിമണികൾ 

കൊത്തിത്തിന്നുന്നതിനിടയിൽ,

നീ ഏതുവിരൽകൊണ്ടാണ് 

ആ സൂചി മറച്ചുപിടിച്ചിരിക്കുന്നതെന്ന് 

പാളിനോക്കും. 

ഓർക്കാപ്പുറത്തൊരു ദിവസം

ഉയരെ,

മേഘങ്ങൾ വകഞ്ഞ്

ഉയരേയ്ക്ക്.......

എനിക്ക് ചിറകു തുന്നാൻ

അവനെന്തിനാണൊരു സൂചി !

താഴെ,

ആ കൈ ഒരു ചെരാതു പോലെ..!

ഉമ്മറത്ത്

കാത്തുനിൽക്കുന്നു,

പാട്ടും മൂളി 

തലമുടി പിഴിഞ്ഞൊതുക്കി 

മഴയിൽ കുളിച്ച രാത്രി.

മലമുകളിലിരുന്നാരോ

ചൂട്ടുകറ്റ വീശുന്നതുപോലെ.

ഇരുട്ടരിച്ച് 

ബാക്കിവെച്ചൊരു താളിൽ 

നക്ഷത്രംപോലെ തിളങ്ങുന്നു 

കല്ലുപതിച്ച 

കുണുക്കിട്ടൊരു വാക്ക്.

പ്രിയമുള്ളൊരു രാത്രി,

അവളുടെ

നേർത്ത വിരലുകൾകൊണ്ട് 

ആകാശത്തെ 

മുറ്റത്തേയ്ക്കഴിച്ചുകെട്ടും.

നിലാവെന്റെ കവിളുകളിൽ

മാറിമാറി ഉമ്മവെക്കും.

ഞാനവിടെ മേഞ്ഞുനടക്കും.

അങ്ങിങ്ങായി ഒറ്റയ്ക്കും കൂട്ടമായും 

മൊട്ടിട്ടുനിൽക്കുന്ന നക്ഷത്രങ്ങളെ 

പറിച്ചെടുത്ത് 

വാക്കടർന്നുപോയ വരികളിൽ 

കോർത്തുവെക്കും.

രാത്രിയത് വാടാതിരിക്കാൻ 

ഒരു കുമ്പിൾ മഞ്ഞും കുടഞ്ഞ് 

ഒരു വല്ലം കിനാവും തന്ന് 

ആകാശത്തയുമഴിച്ചെടുത്ത-

വൾ തിരിച്ചുപോകും.

ഒരു പുഴ വരയ്ക്കാൻ 

പൊതിഞ്ഞു 

സൂക്ഷിച്ചുവെച്ച 

കുപ്പിവളക്കഷ്ണങ്ങളിൽ 

ഒരെണ്ണം, 

പൊടിഞ്ഞ ചോരയുടെ 

ഒരു തുള്ളി, 

ഉറങ്ങാത്ത രാത്രിയുടെ 

ഒതുക്കിപ്പിടിച്ച ജാലകവിരി.

മതിയവൾക്ക് തുടി(ടു)ക്കാൻ.

ആ'

മഴവില്ലിന്റെ 

മുനയൊടിച്ചത് 

നീയാണല്ലേയെന്ന് 

കാറ്റിനോട് കലമ്പി  

ഇറമ്പിലൂടെ 

ചുവന്ന് പെയ്യുന്നു മഴ.!

ചായക്കപ്പിലെ

ചൂടിലേക്കിടുന്ന

കൂട്ടിൽനിന്ന് 

പറന്നുയരുന്ന

ആവിയിൽ  

രക്താർബുദത്തിന്റെ മണം.

(അടുക്കളയിൽനിന്നും 

എത്രവേഗത്തിലാണ്....!!!)

കാറ്റു തല്ലി,

തകർന്ന ജനാലയിൽ

നോവുണങ്ങാൻ 

വിരിച്ചിട്ട വിരലുകൾ.

ഹാ.. 

ചാഞ്ഞുറങ്ങുവാ-

നെത്തുന്നഴികളിൽ,

തൂങ്ങിയാടും

കിനാക്കൂടു വിട്ടിട്ട് 

ചോരവറ്റി, 

മരവിച്ച രാവിന്റെ 

നീരുവറ്റാത്ത 

നനുത്ത ചിറകുകൾ.

അടുക്കള-

യ്ക്കെന്തിന് 

അരഞ്ഞാണം?

അകത്തളത്തിലെ

തൂണിൽ 

ആകാശത്തേക്ക് 

കണ്ണെറിഞ്ഞ്,

വാലുമുറിച്ചിട്ടൊരു 

പല്ലി.

തിള

തിള തിള തിള-

യെന്നൊരു

വീർപ്പിനാൽ

അകംനിറഞ്ഞ് 

പുഴവരച്ച്

കവിത 

കവിത കവിത കവിത-

യെന്ന്,

വാവട്ടംകൊണ്ടൊരു

മൺകലം.

'കളയാം,

നുള്ളിയെടുത്ത്'

നന്നായ് നടക്കുമെന്ന് 

ഇന്നലെയും 

മാറി മാറി മുരണ്ടിരുന്നു,

നേരവും ദൂരവും.

ഹാ ! 

എത്ര

ചടുലമാണെന്റെ വേഗം,

ഈ മുടന്തിന്റെ വഴികളിൽ..!

പെരും-

നുണയായ 

വാക്കേ,

കനലേ....

ഒരിക്കലിണയായി-

രുന്നൊരോർമ്മയിൽ 

നിനക്കു മാപ്പ്.

മുറിച്ചുമാറ്റുന്നു,

ഞാനെന്റെ

നേരായ്,

ഉയിരായിരുന്ന വിരൽ.

കനത്ത  

ജാലകവിരി

നനുത്ത 

വിരലുകളാലെ

വകഞ്ഞുമാറ്റുന്നു

നീ

പതിവുപോലെ,

എത്ര അനായാസമായ്.

കറുത്ത  

കാറ്റിന്റെ 

മറനീക്കിവെച്ച് 

നനഞ്ഞ 

വാക്കുകളാലെ 

അറയൊരുക്കുന്നു

ചുണ്ടിനും കാതിനും  

നമ്മൾ

പതിവുപോലെ,

എത്ര അനായാസമായ്.

നിലാവേ.......

അനിവാര്യതയെന്ന്

ഒരാൾ പോലും

പരോക്ഷമായെങ്കിലും

പറയാത്ത,

ജീവിതമെന്ന് പേർവിളിക്കുന്ന

ഒന്നിനെ,

തിരക്കൊഴിഞ്ഞ കവലയിൽ

കണ്ടുമുട്ടുന്നു.

ഒരു ചായയാവാമെന്ന്

ഒരുമിച്ചൊരു വാക്ക്.

കപ്പുകൾക്കിടയിൽ

പറന്നിറങ്ങിവന്നിരിക്കുന്ന

ഈച്ചയെ

ഒരു ശത്രുരാജ്യത്തെപ്പോലെ

ഭയപ്പെട്ട്

നടുവിരൽകൊണ്ടൊരുമിച്ച്   

ഞൊട്ടിയോടിക്കുന്നു.

മേശപ്പുറത്ത്

നിവർത്തിവെച്ചിരിക്കുന്ന

അനിവാര്യത'യിൽ

കൊതിപ്പിക്കുന്നതെന്തോ

തിരയുന്നതുപോലെ

ഞാനിമവെട്ടാതെയങ്ങനെ

നോക്കിയിരിക്കുന്നു.

അഴിഞ്ഞുവീഴുന്ന

ഇന്നലെയുടുത്തിരുന്ന  

മേൽവസ്ത്രങ്ങൾ,

വിരലറ്റത്ത് പറ്റിപ്പിടിച്ചിരിക്കുന്ന

പകുതിയുച്ചരിച്ചതിന്റെ

ജീർണ്ണിച്ച അവശിഷ്ടങ്ങൾ.

ചില്ലുജാലകത്തിനപ്പുറം

ഇലകളൊഴിഞ്ഞ ചില്ലയിൽനിന്ന്

ഒരു തൂവൽപോലുമില്ലെന്ന

കൊഴിഞ്ഞുവീഴുന്ന നോട്ടം.

വരാനിരിക്കുന്ന 

പെയ്ത്തുകളെക്കുറിച്ച്

വാചാലരായിരുന്ന്

നിവർത്തിയിട്ടതിനെ

വാരിയെടുത്ത്

ഒരു കുഞ്ഞിനെയെന്നവണ്ണം

അടക്കിപ്പിടിച്ച്,

ഒരു വിളിപ്പാടകലെയുണ്ടെന്ന്

അലിഖിതമായൊരു

പ്രതിജ്ഞയിൽ

ഞങ്ങളങ്ങോട്ടുമിങ്ങോട്ടും

കൈകൊടുത്തു പിരിയുന്നു.

(ദി(ദ)ശാസന്ധി)

അടുക്കളയിലെ

പഴയ റേഡിയോയിൽനിന്ന്

അതിനേക്കാൾ പഴയൊരു പാട്ട് 

ചില്ലുപാത്രങ്ങളിലൊന്നിൽ 

നിറച്ചുവെച്ചിരുന്ന   

ചുവപ്പെടുത്ത് 

തിളയിലേക്ക് തട്ടിത്തൂവി 

മുങ്ങി നിവരുന്നു.

പാകമായ പാട്ടു രുചിച്ചെടുത്ത് 

ജനാലപ്പടിയിൽനിന്ന് കാറ്റ്

ചിറകുവിടർത്തി 

മരച്ചില്ലയിലിരിക്കുന്ന കിളികളുടെ

ചുണ്ടിലേക്ക് പകർന്ന്

കിഴക്കുനോക്കി പറന്നുപോകുന്നു.

ഭാരമഴിച്ച് വാ

പറക്കാ'മെന്നൊരു 

വാക്ക്, 

നിന്റെയാകാശമെന്നും.

കിനാക്കൾ 

ഇരുട്ടിനോടൊത്തിണ-

ചേർന്നു രമിക്കുന്ന

മായാപ്രപഞ്ചമാകാമെന്ന്.

വെളുത്തും 

ചുവന്നും കറുത്തും 

ഉടലുയിരഴിഞ്ഞുഴിഞ്ഞ്, 

ഒടുവിൽ ഞാനൊറ്റയായ് 

ഉടൽകുഴഞ്ഞുയിർകുഴഞ്ഞ്.

മേഘങ്ങളെപ്പോൽ 

എഴുതിയും മായ്ച്ചും 

വീണ്ടുമെഴുതിയും

ഭൂമിയോളം ചെറുതായവനേ,

ദൈവമായതുകൊണ്ടുമാത്രം

നിനക്കു മാപ്പ്.

വീണ്ടെടുക്കാനാവാത്ത

ഒരുവളെയും ചുമലിലേറ്റി

ദിക്കറിയാത്ത യാത്ര.

ദാഹമോ വിശപ്പോ അറിയാതെ.

ആ ഉള്ളിൽ തുടിക്കുന്ന

പവിത്രമായ രഹസ്യത്തെ 

ഒന്നിറക്കിവെക്കാൻ

ഒരു ചുമടുതാങ്ങിയുടെ നിഴൽ 

ഏതു ദേശത്താവും 

തിരുശേഷിപ്പായുണ്ടാവുക.

കാലുകൾ കുഴയുന്നു.

കേൾക്കുന്നുണ്ട്.

പാട്ടുപേക്ഷിച്ച്

പറന്നുപോകുന്ന കിളികൾ

ചിറകുതിർത്തിടുന്നതിന്റെയൊച്ച.

.

 

മുട്ടായി-

ക്കടലാസിനുള്ളിൽ 

വിയർത്തൊലിച്ചിരുന്ന്

നാരങ്ങാനിറത്തിൽ 

സൂര്യനെ വരയ്ക്കുന്നു 

ഭൂമിവലിപ്പമുള്ളൊരോർമ്മ.!

വേഗമാവട്ടെ'യെ-

ന്നൊരാജ്ഞയുടെ

പിറകേ നടന്നെത്താൻ

നേരമൊട്ടും വേണ്ടിവന്നില്ല.

പലവട്ടം കൊതിച്ചിട്ടും

പറയാതെപോയ വാക്കിനെ

മൂടിവെച്ചിരുന്ന ചെപ്പ്,

കിനാവുകൾക്ക്

ഈറ്റില്ലമൊരുക്കാൻ

ഭദ്രമായ് മടക്കിയെടുത്ത

കറുകറുത്ത ആകാശം.

മതി,

മറ്റൊന്നുമെടുക്കേണ്ടതില്ല,

മഴവില്ലുകൊണ്ടെനിക്കൊരു 

പുരമേഞ്ഞൊരുക്കാൻ.

ഛായാമുഖി

കാട്ടിലൊരുവൾ

കാടായ് കരഞ്ഞന്നാണ് 

കണ്ണീരിലെന്റെയുടൽ

രണ്ടായ് പിളർന്നത്.

മുറിവിന്നാഴത്തിൽ 

ഞാനെന്നെയുടച്ചത്.

ഒരു മായക്കാഴ്ചയായ്,

കഥാതന്തുവായൊടുങ്ങിയത്.

അന്നൊരു

വിലാപപർവ്വമായയെന്നെ 

പൊതിഞ്ഞെടുത്തത്

രാജരക്തമിരമ്പുന്ന 

നിന്റെ ബലിഷ്ഠമായ കൈകൾ.

   

കൊട്ടാരക്കെട്ടിനുള്ളിൽ

എന്നിൽ തെളിയാതിരുന്ന  

നിന്റെ 

ഛായാചിത്രത്തെയോർത്ത് 

നീ

ഒരലർച്ചയായൊടുങ്ങവെ,

ഞാൻ കാണുന്നുണ്ട്,

അങ്ങകലെ

പ്രണയംകൊണ്ട് 

മുറിഞ്ഞുപോയൊരു   

കാട്ടുപെണ്ണിന്റെ,

നിന്റെ അതിശക്തനായ-

മകന്റെ

അമ്മയായവളുടെ ചുണ്ടിൽ 

മിന്നിമറയുന്ന 

അതിഗൂഢമായൊരു ചിരി.

ഏതു കടലിനാണ്

അവളുടെ കണ്ണീർപ്പുഴയെ

ഒതുക്കിപ്പിടിക്കാനാവുകയെന്ന്

ചിന്തിച്ച്,

പേർത്തും പേർത്തും

ചിന്തിച്ച് 

കണ്ണൊന്നു ചിമ്മിയടയ്ക്കെ,

നിന്നോടെങ്ങനെ

പറയാതിരിക്കാനാവും.

ഹേ...

വൃകോദരാ,

നീ തച്ചുടയ്ക്കും മുമ്പേ

രണ്ടായ്  നുറുങ്ങിയവളാണ്

ഞാനെന്ന മായ/നേര്..!

വെടിയുണ്ടകൾ

ഇരുവശത്തുനിന്നു-

മെന്റെ ചെവികൾക്കുനേരേ

പാഞ്ഞടുക്കുന്നതിന്റെ-

യൊച്ചയിൽ

ഞെട്ടിവിറയ്ക്കുന്നു

വിരലുകൾക്കിടയിലിരുന്ന് 

പത്രത്തിന്റെ ഒന്നാംപേജ്.

ഉറക്കെ കരഞ്ഞ്

തളർന്ന് 

ഒന്നുമറിയാതുറങ്ങുന്ന

പിഞ്ചുകുഞ്ഞുങ്ങളെ 

മാറോടടക്കിയ അമ്മമാരിലേക്ക് 

ചീറിത്തെറിക്കുന്ന 

ചോരയിൽ

നനഞ്ഞുകുതിരുന്നു,

വെടിപ്പായ് തുന്നിയെടുത്ത

നഗരത്തിന്റെ കുപ്പായം.

താങ്ങാനാവാത്ത 

കെടുതികളുടെ ചൂടിൽ

വെന്തുരുകുകയാണ് 

ഉള്ളറകൾ.

പടക്കോപ്പിൽനിന്ന്,

ചൂഴ്ന്നെടുത്ത

എന്റെ കണ്ണുകൾ

രണ്ടു തീഗോളങ്ങളായ്

താഴേക്ക്.

പൊട്ടിയ കപ്പിലെ 

ചായയുടെ കറപടരുന്ന  

കരിഞ്ഞ പേജുകളിൽനിന്ന് 

എന്റെ മുറിഞ്ഞുതൂങ്ങിയ 

കാലുകൾ

എന്റെ രാജ്യാതിർത്തി കടന്ന് 

പലായനംചെയ്യുകയാണ്.

(യുദ്ധമെന്ന വാക്കിനേക്കാൾ

അശ്‌ളീലമായി 

ഏതു വാക്കുണ്ട്

ഒരു രാജ്യത്തിനെടുത്ത്

പ്രയോഗിക്കാൻ.)

ഓടിവന്ന്  

മുഖമുരുമ്മിയിരിക്കും. 

വഴിയിലെവിടെങ്കിലും 

ഞാൻ മറന്നുവെയ്ക്കുന്നു-

വെന്ന തോന്നലിൽ 

വായനയ്ക്കിടയിലിരുന്ന് 

മറ്റേതോ ഭാഷയുടെ 

കൂർത്ത നഖംകൊണ്ടെന്റെ 

കൈത്തണ്ടയിൽ

ചെറുങ്ങനെ വരയും.

അടുത്തും അകന്നും

മാറിമാറിയിരിക്കും,  

ഇരുട്ടിലേക്ക്  

നിലാവ് പെയ്യുന്നതുപോലെ

വിരലുകൾകോർത്ത്.

പൊടുന്നനെ കാണാതാവും.

നനുത്ത

രോമങ്ങൾ കൊഴിച്ചിട്ട്

നനഞ്ഞ 

പൂച്ചക്കുഞ്ഞിനെപ്പോലെ.

മറ്റേതോ വരിയിൽ

കടന്നിരിക്കും,

വാക്കുകൾക്കു നടുവിൽ 

പുറം കുടഞ്ഞുകുടഞ്ഞ്.

ഞാനെന്റെ 

മുറിഞ്ഞവായനയെ

ഒരു നിശ്വാസത്തിലേക്ക് 

മടക്കിവെയ്ക്കും.

തണുക്കുന്നല്ലോയെന്ന്  

പാളിവരുന്ന 

നോട്ടത്തിന്റെ നീണ്ടപുരികം 

മെല്ലെ തലോടി

എന്റെ വാക്കേ,

എന്റെ പെരുംനുണയേ'യെന്ന്

തണുക്കാതിരിക്കാൻ

പതിച്ചുകൊടുക്കും

ഞാനൊരു വിരൽപ്പുതപ്പ്.

(വാക്കേ......)

 

ഇരുട്ടിനെ 

നേർപ്പിച്ചെടുത്ത്

അകംപുറം പച്ചയായ  

കൂട്ടിൽ 

ചേർത്തിളക്കി 

ചുട്ടെടുത്ത കിനാവുകൊണ്ട് 

അടുക്കളയ്ക്ക്

പ്രാതലൊരുക്കുന്നു പകൽ.

ന്യാസം

മുട്ടിവിളിക്കുന്ന
ഓർമ്മകൾക്ക് 
മുൻവാതിൽ 
തുറന്നുകൊടുക്കുന്ന   
വരാന്തയിലെ  
നേർത്ത തണുപ്പ്.
കൂട്ടിന്,
മുറ്റത്തു നിഴൽപുതച്ച് 
ചാഞ്ഞുറങ്ങുന്ന
ചില്ലകളുടെ പച്ച.

ഓരോ അറകളിലുമവർ
കയറിയിറങ്ങും.
ഒരു പോറലോ മുറിവോ
വന്നുപെട്ടിട്ടുണ്ടോയെന്ന്
അരിച്ചുപെറുക്കും.

അംഗഭംഗത്തിന്റെ 
ഒരടയാളംപോലും 
കണ്ടെത്താനാവാതെ
യുദ്ധമെന്നും
സമാധാനമെന്നുമവർ
പരസ്പരം വായിക്കും.

ജനനമെന്നോ 
മരണമെന്നോ  
രേഖപ്പെടുത്താത്ത     
മടങ്ങിപ്പോക്കിനിടയിൽ,
വിരൽ കൂട്ടിപ്പിടിച്ച്
അമർത്തിത്തലോടൽ.

ഉള്ളിലൊരു
പായ വിരിക്കണം.
വിയർത്തൊരുച്ചയെ
മടക്കിയെടുത്ത്
തലയിണയ്ക്കടിയിൽ
ഭദ്രമായ് വെച്ച്,
ജനലഴികളിൽ
കണ്ണുകളെയഴിച്ചു കെട്ടി
രാത്രിക്കെന്തൊരു

ചന്തമെന്ന് 

ഉരുവിട്ടുരുവിട്ടുറങ്ങണം.

തണലായ് 

മുളയ്ക്കുന്നൊ-

രോർമ്മയെ  

ഇല തൊട്ടു കൂട്ടി 

നട്ടു നനച്ച് 

നിഴലും നോക്കി  

പതിഞ്ഞിരിക്കുന്നു 

പച്ചയായൊരൊതുക്കുകല്ല്.

ഒരിളം 

തെന്നൽപോലും

തൊട്ടുനോക്കാത്ത

ഉടലിൽനിന്ന്

നീ'എന്നെയൊരു-

കൊടുങ്കാറ്റായഴിച്ചെടുക്കുന്നു.

വസന്തംനുകരാത്ത

ചില്ലയറ്റത്ത് 

പണിതൊരുക്കുന്നു 

ശലഭങ്ങൾക്കൊരു മേട.  

കാറ്റിനു ചൂളംവിളിക്കാൻ

കിളിയൊച്ചകളൊടിച്ചുകുത്തി  

കടവിലൊരു മുളങ്കാട്.

 

ഒരുതുള്ളി മഴയെ 

നീട്ടി നിവർത്തിവിരിച്ച്

തെളിനീരിനു പാടാനൊരരുവി.

കടല് കൊയ്യാൻ

ഉച്ചവെയിൽനെറ്റിയിൽനിന്ന്

ഒരിറ്റു വിയർപ്പുകൊണ്ടൊരു വിത.

രാവിന് പൊട്ടുകുത്താൻ

പൂവാകപെറ്റ നിറങ്ങളിൽനിന്ന്

നുള്ളിയെടുത്തൊരിതൾ.

വാക്ക് ഒന്നു വായിച്ച്

കിനാക്കൾ നൂറു മെനയുന്നവളേ,

ഒരിലയുടെ പച്ച വരച്ച്

കാടായ് പൂക്കുന്നവൾ നീ'.!

നീന്തിക്കടക്കാൻ 

ഒരു മല,

ചവിട്ടിക്കയറാൻ

ഒരു പുഴ,

വിരൽമിനുക്കാൻ 

ഒരു രാഗം.......

നീ'യില്ലയെങ്കിൽ

ഞാനൊരിലയായ്

വിണ്ണിൽ ചോക്കുന്നതെങ്ങനെ.

മഴവില്ലു മെടഞ്ഞു പിഴിഞ്ഞ്
മഴക്കൊട്ട നെറയ്ക്കാം പെണ്ണേ,
കിനാവിന്റെ ചില്ലയെടുത്താ-
യിറമ്പൊന്നു ചെത്തിയൊരുക്ക്.

ഉത്തരം കിട്ടാതെ

മരക്കൊമ്പിൽ

തലകീഴായി തൂങ്ങിയാടുന്നു

കാത് നഷ്ടപ്പെട്ടൊരു വാക്കിന്റെ

ചോരവാർന്ന ചുണ്ട്.

നിദ്രകൊണ്ട്

പകലിന്റെ നീളം 
വെട്ടിക്കുറയ്ക്കുകയാണെങ്കില്‍ 
അന്തിത്തിരി കത്താതെ
നിലവിളക്കില്‍
പച്ച പടരുകയാണെങ്കില്‍ 
നുരഞ്ഞുപൊങ്ങുന്ന രാഗവീചികള്‍ക്കുനേരെ
കാതുപൊത്തിപ്പിടിച്ച്‌
അസഹിഷ്ണുവാകുന്നുവെങ്കില്‍ 
പാറുന്ന ശലഭമിഥുനങ്ങളുടെ
ചലനവേഗം
നിര്‍വികാരതകൊണ്ടളക്കുക-

യാണെങ്കില്‍ 

മുഖത്ത് പടരുന്ന മഴത്തുള്ളികള്‍
തുടച്ചെറിഞ്ഞ് 
മേലേനോക്കി കയര്‍ക്കുകയാണെങ്കില്‍ 
നിന്റെ മുടിയിഴ തലോടാതെ
എന്റെ വിരലുകള്‍
മരവിച്ചിരിക്കുകയാണെങ്കില്‍ 

പ്രിയനേ,
നീയെനിക്ക്
ദയാവധത്തിന്റെ പുണ്യം തരിക.

നിലാ

*

പുറത്ത് 

രാക്കിളിയുടെ പാട്ട്.

പതിയെ

ആടിയാടി അലസമായ് 

നിൽക്കുന്നു 

ഒറ്റപ്പാളിയുള്ള വാതിൽ.

അകത്ത് 

പടരുന്ന വെളിച്ചം.

ഒരീയാംപാറ്റച്ചിറകോ, 

സർക്കസുകാരന്റെ 

മെയ് വഴക്കത്തോടെയത്  

ചുമലിലേറ്റാൻ

ഒരുറുമ്പോ....   

ഇല്ല,

അടയാളമൊന്നുമില്ല.

പട്ടുപാവാടഞൊറികളിൽ

ഇരുട്ട് 

ലാസ്യമായഴിയുന്നയൊച്ച.

നിറങ്ങൾ പൂക്കൂടയിലഴിച്ചുവെച്ച് 

പൂക്കൾ, 

ഈറൻമാറുന്ന

ത്രസിപ്പിക്കുന്ന ഗന്ധം.

നനഞ്ഞിട്ടും നനഞ്ഞിട്ടും  

വറ്റാത്തയെണ്ണയിൽ

ഒരു തിരി, 

ആയിരം വിരലുകളാൽ 

ആകെയുഴിഞ്ഞ് 

പൊതിഞ്ഞുപിടിക്കുന്നെന്നെ,

അവർണനീയമായ

ഒരു പുരാതനശിൽപത്തെയെന്ന-

പോലെ.

അത്രയുമത്രയുമാഴത്തിലാണ് 

നിന്നെ ഞാൻ കൊളുത്തിവെച്ച-

തെന്റെ പ്രണയമേ.

വാതിൽപ്പടിയിൽ

വന്നുനിൽക്കുന്നൊരുവൾ,

ഉറക്കംവരാതെ

വരിയിൽനിന്ന് വേറിട്ട്,

അടർന്നുപോകാതെ

സ്വയമടക്കിപ്പിടിച്ച്.

തോരാത്ത കണ്ണുകളും 

മഷിയൊഴുകി കറുത്ത കവിളും.

അവളിരുന്നു,

ചെറിയൊരു പൊട്ടുപോലെ 

ശേഷം ഞാനും.

മുറ്റത്ത്,

കൊഴിഞ്ഞുവീണയിലകളിൽ  

സന്ധ്യ നിറമഴിച്ചുവെച്ച  

മഴയുടെ നേർത്ത ഗന്ധം. 

കാറ്റ് വലിച്ചുകെട്ടിയ മറയിൽ 

മരങ്ങൾക്കു താഴെ 

ഇണചേരുന്ന ചില്ലകളുടെ

നിഴലുകൾ.

നേരമാകുന്നു,

നിലാവസ്തമിക്കുന്നു,

തൊടിയിൽ 

വിളഞ്ഞ് പാകപ്പെടുന്നിരുട്ട്.

കൊയ്തുകഴിഞ്ഞ് ആകാശവും.

അകംപുറമെഴുതി 

കണ്ടെടുക്കേണ്ടതായുണ്ട്,

ഒരു വാക്കിനും 

ഒരു പൂർണവിരാമത്തിനുമിടയിൽ

പൂത്തുനിന്നൊരു കാലത്തെ  

പച്ചകുത്തിയ കയ്യൊപ്പ്.

കൂടൊഴിഞ്ഞു

ഞാൻ'എന്ന വരി 

നീയെങ്ങനെയാണ്

വായിക്കുക.

ഒരടയാളവാക്കുപോലും 

കൈമാറാതിരിക്കെ.

നിലാവിന്റെ ജാലകവിരി

മെല്ലെയൊതുക്കിവെക്കണം.

വെളിച്ചത്തിൽ മുങ്ങി

നിശ്ചലമായിരിക്കുന്നുണ്ടാവും

ദൂരെയൊരൂഞ്ഞാൽ.

ഊഞ്ഞാൽപ്പലകയിലേക്ക്

പറന്നുവന്നിരിക്കുമപ്പോൾ

ഒരു കുഞ്ഞു വെളുത്തതൂവൽ.

കിനാവേയെന്ന് നീട്ടിവിളിക്കണം.

ഒരു മാത്ര.....

മറുവിളി മാഞ്ഞുപോകും.

ഇരുണ്ട്,

ജാലകവിരി ഊർന്നുവീഴും.

രാപ്പാടികൾ പതിവിലുമുച്ചത്തിൽ 

പാടിപ്പറന്നുപോകും.

ചീവീടുകൾ ശ്വാസമെടുക്കാതെ

ചിലച്ചുകൊണ്ടേയിരിക്കും

കറുകറുത്തൊരു പൂവ്

കാറ്റിന്റെ കൈക്കുള്ളിൽനിന്ന്

നിന്റെ 

വിരൽത്തുമ്പിലേക്കടർന്നുവീഴും.

അപ്പോൾ നീ......

ഇനിയും ജനിച്ചിട്ടില്ലാത്ത 

നിനക്കെങ്ങനെയാണ് 

എന്നെക്കുറിച്ചെഴുതാനാവുക.

വാതിൽ

ഉറക്കെ കരഞ്ഞതിന്റെ

ഒച്ച,  

മുറ്റത്തുണരാൻ തുടങ്ങുന്ന

മരത്തിൽ തട്ടി

കുടഞ്ഞെണീറ്റ് 

മേഘങ്ങളിലേക്ക് പറന്ന്

കേൾക്കാതാകുന്നു.

കാത്തിരിക്കാൻ തുടങ്ങീട്ട്

എത്രനാളായീന്ന് പരിഭവിച്ച്

ചുവരുകൾ നാലുപേർ 

കോറസ് പാടുന്നതുകേട്ട്

പറന്നുപോയ കിളി

തിരികെ വന്ന് 

അതിന്റെയൊരു തൂവൽ 

കൊത്തിയെടുത്ത് അകത്തേക്കിടുന്നു.

മഴ വന്നിരുന്നിട്ട് പോയതിന്റെ

പല വലിപ്പത്തിലുള്ള വൃത്തങ്ങൾ

താഴേക്ക് പെറുക്കിവെക്കുന്നു,

നന്നായടുക്കി മേഞ്ഞിരുന്ന

ആകാശം കൊണ്ടുള്ള മേൽക്കൂര.

കട്ടപിടിച്ച മാറാലകളിൽ  

പറ്റിപ്പിടിച്ചിരുന്നാടുന്ന  

മഞ്ഞുതുള്ളികളിൽ 

തൊട്ടുനോക്കി രസിക്കുന്ന

വെളിച്ചത്തിന്റെ വിരൽത്തുമ്പുകൾ.

എന്റെ ഒറ്റമുറി.

പല പല നിറത്തിലുള്ള ചട്ടകളിട്ട് 

മേശപ്പുറത്തും നിലത്തും

കിടന്ന് 

അടുക്കില്ലാതെ ചിരിക്കുന്ന

പുസ്തകങ്ങളുടെ

വലുതും ചെറുതുമായ പേരുകൾ.

എന്റെ ഒറ്റമുറി(വീട്)

കാറ്റിന്റെ കൈയിൽ നിന്ന്

തണുപ്പിന്റെ ചെപ്പും വാങ്ങി 

മേശമേൽ വെച്ച്  

ഞാനീ ഓടാമ്പലടയ്ക്കുന്നു.

ഡയറി തുറന്ന് 

പോയകാലത്തിന്റെ

ഉണങ്ങാത്ത അക്കങ്ങൾക്ക് 

കടുപ്പത്തിലൊരു വര കൊടുത്ത്

ഞാനെഴുതാൻ തുടങ്ങുന്നു.

28/01/2022

കരഞ്ഞുകരഞ്ഞ്

ഞാനുറങ്ങാതെ കിടന്ന

എന്റെ അവസാനത്തെ രാത്രി.

29/01/2022

നേരം

നന്നായ് വെളുത്തിരിക്കുന്നു

ഒഴുകിപ്പരക്കുന്ന 

ഏകാന്തതയുടെ അഭൗമസംഗീതം

മെല്ലെ, 

ഞാനൊരു നനുനനുത്ത

...........................................

കട്ടിലിൽ കിടത്തി

നാലാളൊരുമിച്ച്

അക്കരെയെത്തിക്കാൻ 

ചുമന്നുകൊണ്ടുപോയ

ഒരുവളെക്കുറിച്ചെനിക്കറിയാം.

(പ്രായം ഒരുമാസം തികയാത്ത

കുഞ്ഞായിരുന്നു ഞാനന്ന്.)

നീണ്ടുചുരുണ്ട തലമുടി

കട്ടിലിന് താഴേയ്ക്ക് 

പുഴപോലൊഴുകിയിറങ്ങിയിരുന്നുവെന്ന്

ഓർമ്മകൾ അയവിറക്കി

പെണ്ണുങ്ങളെന്നെ ചേർത്തുനിർത്തി

കണ്ണീര് തുടച്ചിട്ടുണ്ട്.

ഒരിക്കലല്ല,പലതവണ. 

തിരികെ ചുമന്നുകൊണ്ടുവരുമ്പോൾ

ആ കണ്ണുകൾ അടഞ്ഞിരുന്നെന്ന്,

മുലപ്പാൽ ചോർന്നൊലിച്ചിരുന്നെന്ന്,

കരഞ്ഞുകരഞ്ഞ് അമ്മമ്മയ്ക്ക്

ഭ്രാന്തായെന്ന്,

പ്രണയിച്ച് സ്വന്തമാക്കിയവളുടെ

നഷ്ടത്തിലും 

അച്ഛൻ ഭ്രാന്തുപിടിക്കാതെ

പിടിച്ചുനിന്നെന്ന്,

പിന്നീടൊരുനാൾ പാലം വന്നെന്ന്,

ആശുപത്രീം പള്ളിക്കൂടോം

ആപ്പീസുമെല്ലാം

വീടിനടുത്തേക്ക് വന്നെന്ന്.

ഞാനുറങ്ങുംമുമ്പേ അച്ഛനെത്തി

ചുമലിലേറ്റിനടന്നതും

എന്നെ കരയിക്കാതെ കൊണ്ടുനടന്ന 

പകലിന്റെ കഥ മുഴുവൻ

അച്ഛനോടെനിക്ക് 

പറഞ്ഞുകേൾപ്പിക്കാനായതും

ദൂരം അടുത്തായതുകൊണ്ടു മാത്രം.

ലോകം വളർന്നു

ഒപ്പം

ഞാനും എന്റെ ചിന്തകളും

മലകളെ സ്നേഹിച്ചു

പുഴകളെ സ്നേഹിച്ചു

പുല്ലിനെ,പുൽച്ചാടിയെ സ്നേഹിച്ചു 

മനുഷ്യനെ സ്നേഹിച്ചു.

മനുഷ്യന് 

സമയത്തെക്കാൾ വിലപ്പെട്ട

മറ്റൊന്നും ഭൂമിയിലില്ലെന്ന്

ഓരോ യാത്രയിലും കുറിച്ചുവെച്ചു.

'വേഗമാണ്'

എനിക്ക് സ്വന്തമായതെങ്കിൽ

'പ്രകാശവേഗമാണ്' 

നിനക്കുവേണ്ടതെന്ന്

നാളെയോട്...

എനിക്കെത്തിപ്പെടാനാവാതെപോയ 

ഇടങ്ങളിൽ

നീ എത്തിപ്പെടണമെന്നും.

അതിന് 

നിഴലുകളുടെ മേൽ പ്രകാശംപരന്ന് 

വെളിച്ചപ്പെടേണ്ടതുണ്ട്.

(കവിതയല്ല....)

ഒരിലകൊണ്ട്

ഒരു കാട് നിർമ്മിക്കാനാവുമെന്ന്

ഉച്ചിയിൽ പൂക്കുന്ന വെയിൽ.

ഒരു തൂവൽ ഓർമ്മകൊണ്ട്

ഒരാകാശം നിവർത്തിവിരിക്കാമെന്ന്

ഉള്ളിൽ കുറുകുന്നൊരു കൂട്.

ഒരു വാക്കുകൊണ്ട്

ഒരു മതിലു നിർമ്മിക്കാനാവുമെന്ന് 

കാറ്റ്,വിരൽ മിനുക്കുന്നതിന്റെ

കാതടിപ്പിക്കുന്ന ഒച്ച..!

പുഴയായ്

വരച്ചതാണെന്നെ.

നനവായ്

അടരാതിരിക്കുമെന്ന്

പലകുറി പറഞ്ഞ്

പകലിരവറിയാതറിഞ്ഞതാണ്.

കാടറിഞ്ഞ്

മേടറിഞ്ഞ്

മണ്ണായവനെന്നൊരു 

വാക്കിന്റെ പച്ചയിൽ 

അകംപുറം നിറഞ്ഞ്  

ഒഴുകിയൊഴുകി

തെളിഞ്ഞതാണ്.

നിശ്ചലതയുടെ

ആഴത്തിലേയ്ക്കെന്നെ

കുഴികുത്തി മൂടിയവനേ,

ദൈവമായതുകൊണ്ടുമാത്രം

നിനക്കു മാപ്പ്.

ആർദ്രമെന്നും

ശ്രുതിമധുരമെന്നും 

പറഞ്ഞിരുന്നു.

പൂവിതളുകളിൽനിന്ന് 

മഞ്ഞുകണങ്ങളടർന്നു-

വീഴുന്നതുപോലെ

മോഹനമെന്നും. 

ചിട്ടപ്പെടുത്തിയതാണ് 

ഏറ്റം പ്രിയതരമായൊരു 

ഗാനമായെന്നെ.

നീയുണരുന്നതിനും

ഏഴരനാഴിക

മുമ്പേയുണരുമെന്നും 

ഒരു രാഗംകൊണ്ടോരായിരം

മിഴികൾ തുറക്കുമെന്നും 

കിനാവുകളെ  

ഈറനുടുപ്പിച്ചതാണ്.

നിശബ്ദതയുടെ

ഗർഭത്തിലേയ്ക്കെന്റെ ചുണ്ടിനെ 

പൊതിഞ്ഞുവെച്ചവനേ

ദൈവമായതുകൊണ്ടുമാത്രം

നിനക്ക് മാപ്പ്.

ഒരു മൂളിപ്പാട്ട് ചുരത്തി 

ഈ രാവിനെയെങ്കിലുമൊ-

ന്നുറക്കാനായെങ്കിൽ.

കുഞ്ഞു നിലാവിരലുകൾ

വിടർത്തിയെടുത്ത് 

മധുരമായൊരു 

വാക്കിന്റെ താക്കോൽ

തിരുകിവെക്കാനായെങ്കിൽ.

ഹാ....!

തുളുമ്പരുതെന്നൊരു കാറ്റ്

കൺപോളകൾ തഴുകി

വിരൽഞൊടിച്ച് 

പറന്നുപോകുന്നതിന്റെയൊച്ച

തോന്നിയതാവും,വെറ്തെ.....

ഇന്നലെയും

തന്നു പോയതാണ്

ഇതേ നേരത്ത്

ഒരുപിടി വാക്കുകളൊന്നായ്

ജ്വലിച്ചുനിൽക്കുന്നൊരാകാശം.

തൊട്ടെടുത്ത്

അടക്കിപ്പിടിച്ച്

കൊളുത്തിവെച്ചതാണ്

നെഞ്ചകത്ത്

കിനാക്കളൊന്നായ് 

തെളിയുന്ന നിലാവിളക്ക്.

നിന്റെ വിരലായെന്നെ

മിനുക്കിയെടുക്കുമെന്നും

കോർത്തുപിടിച്ച്

ഒന്നായ് 

ഒരു മഴയായുതിരുമെന്നും

രാവിന് മഷിയെഴുതിയതാണ്.

നീയാണെന്റെ കവിതയെന്ന

പെരുംനുണയുടെ

തിരിയായെന്നെ

തെറുത്തെടുത്തവനേ,

ദൈവമായതുകൊണ്ടുമാത്രം

നിനക്ക് മാപ്പ്.

ഇന്നലെയും 

കിനാവിൽ വന്നിരുന്നു,

ഇതേ നേരത്ത്.

ആടിയുലഞ്ഞൊരു കാറ്റ്

ഇതു വഴി വരുമെന്നും

ചെമ്പകപ്പൂക്കളെയാകെ

ഉതിർത്തിട്ടുതരുമെന്നും

ചെവിയിൽ പറഞ്ഞതാണ്.

മണ്ണടരുകൾക്കിടയിലൂടെ

ഞാനവയെ 

ചേർത്തുപിടിക്കുമെന്നും

ആ ഗന്ധത്തിന്റെയുന്മാദത്തിൽ

അലിഞ്ഞലിഞ്ഞ്

ഞാനില്ലാതാകുമെന്നും 

കിനാവുകൾക്കു മേലേ-

യൊരു കിനാവിനെ 

തുന്നിച്ചേർത്തതുമാണ്.

കാറ്റ് പതിക്കാത്ത ദേശത്ത്

എന്നെ അടക്കംചെയ്തവനേ,

ദൈവമായതുകൊണ്ടു മാത്രം

നിനക്ക് മാപ്പ്.

പതിയെ,

അടർത്തിയെടുത്ത്

ഒരൊച്ചയെ താഴേക്ക്.

പേരായത്,

ആഴത്തെ തൊട്ട്,

പടവുകളെയൊന്നൊന്നായ്

പിന്നിലാക്കി 

മുകളിലേക്ക്.

വൃത്തത്തിന്റെ 

കറങ്ങുന്ന വേഗത്തിൽ 

ചവിട്ടി,തെറിച്ച് 

ചേർന്നുനിന്ന കൊമ്പിലേക്ക്.

ഒരു മാത്ര......

കിളിയൊച്ച മെഴുകിമിനുക്കിയ

ചില്ലയിൽ,

അതിന്റെ തണുപ്പിൽ.

പിന്നെയൂർന്ന്

നെറ്റി തൊട്ട്

ശ്വാസം മണത്ത്

ചുണ്ടിലൂടെ 

വിരൽത്തുമ്പുകളിലേക്ക്.

ഒരു തുടത്തിൽനിന്നൊരു- 

തുള്ളി ജലം നനച്ച്

കണ്ണുകളടച്ചുപിടിച്ച് 

അതിന്റെ മഞ്ഞിച്ച ഞരമ്പുകളിൽ

ഞാൻ വായിക്കുന്നു,

ആരോ കോറിയിട്ട

എന്റെ പേരിന്റെ ആദ്യക്ഷരം..!

പുഴ പാടും
പാട്ടിലലിഞ്ഞു
മാരുതൻ
ഇരുൾചായമുടുത്തു
പൂക്കളും
കുയിൽ പാടിയ
രാഗമോർത്തോർത്ത്
വഴിനോക്കിയിരുപ്പാണ്  
ജാലകം.

തിരിതാഴ്ത്താൻ
മിഴി വെമ്പൽപൂണ്ടിതാ
വരിക
നറുനിലാമഞ്ചലിൽ
തൊടുക 
കിനാപ്പൊൻതൂവൽ 

നെറുകയിൽ.

നീ കോറിയിട്ട 

കിനാവിന്റെ നഖപ്പാടുകൾ

കൊണ്ട് 

കറുത്തതാണ്

ഇരുട്ടിന്റെ കവിൾത്തടം.

ഹാ !

എന്തൊരിരുട്ടാണെന്റെയീ 

ഇരുട്ടിന്.

തിളമാറാത്ത 

കടലിന്റെ ഉപ്പുപാകം 

നോക്കാൻ  

പോയിരിക്കുന്നു സന്ധ്യ.

സാരിത്തുമ്പിൽ 

താക്കോലും കെട്ടിയിട്ട് 

അടുക്കളയ്ക്ക് കൂട്ടായ് 

കുളക്കടവിലേയ്ക്ക് 

ഞാനും.

വിരലിൽതൂങ്ങി കൂടെവന്ന് 

ഇളകിയ ഒതുക്കുകല്ലിനെ

മറിച്ചിട്ട്,

കൂടെവീണ്,

കുടഞ്ഞെണീറ്റ്,

വീണ്ടും 

ഒപ്പമെത്തിനിന്ന് കിതയ്ക്കുന്നു

കുഞ്ഞനിരുട്ട്.

കടുകു താളിച്ചതിന്റെ മണം 

ഊക്കോടെ ചെന്നുതട്ടി

ശ്വാസമെടുത്തത് 

വഴിയിൽ നിന്ന കുരയുടെ 

തെറിച്ചുവീണ മൂക്കിൽ.

ഞെട്ടിത്തരിച്ച്, 

അടർന്നുവീണപ്പാടെ 

ചിതറിത്തെറിച്ചു

ഉയരത്തിൽനിന്നൊരു 

ചില്ല.

പേടിക്കാതിരിക്കാൻ

ചുണ്ടിലൊരു മൂളിപ്പാട്ടും

കൊളുത്തിപ്പിടിച്ച്    

ഞങ്ങള് കൈകോർത്ത്

വേഗം കൂട്ടി.

കറന്നെടുത്ത 

ചൂടാറാത്ത പാലിന്റെ കുടവും 

ചുമന്നതാ  

നിലാവൊരുത്തി.

ചൂളം വിളിച്ച് 

കൽപ്പടവ് ചൂണ്ടി 

ഇത്തിരിനേരമെന്ന്

ഞാൻ.

അടുക്കള മുങ്ങിനിവർന്ന്  

തലതോർത്തുന്നതും കാത്ത് 

ഞാനുമവളും 

ഒഴുകിത്തീരാത്ത കഥകളിൽ 

കാലും നനച്ചങ്ങനെ.

തിടുക്കത്തിൽ

വിടർന്ന കാതുമായെത്തിയ

നക്ഷത്രത്തിന്റെ കൈക്കുമ്പിളിൽ

കിനാവൊരുക്കാൻ 

മഞ്ഞു കൊടുത്തയച്ചിരിക്കുന്നു 

നിറയെ പിച്ചകമൊട്ടുകൾ..!

കടലും ആകാശവും 

പോലെ

അവളും നീലയായ് 

വരയ്ക്കപ്പെട്ട്.....

മുഖം ചെരിച്ച്,

കരയോട് രഹസ്യമായെന്തോ 

പറഞ്ഞതുപോലെ. 

കാൽവിരലുകളിറക്കിവെച്ച്

പുഴയിലെന്തോ 

ബാക്കിവെച്ചതുപോലെ.

കിനാക്കൾ

മരവിച്ചതിന്റെ തിണർപ്പ്

കണ്ണുകൾക്കുമീതെ.

ചുണ്ടുകൾ വിട്ട് 

വേദന പിന്നിട്ടു പിന്നിട്ടൊരു  

വാക്ക്

മലമുകളിലെത്തി,

മഴയെത്തുന്നതുവരെ 

അഴിയാതിരിക്കാൻ  

മരപ്പൊത്ത് തേടുകയാവും.

തൊട്ടുനോക്കുന്നാരോ,

നീന്താനറിയാതെ

'ആഴമാകാനിറങ്ങിയവൾ'

എന്നൊരു വരി

ദീർഘമായ നിശ്വാസവും ചുമന്ന്  

പുഴ മുറിച്ചുകടന്ന്

മറഞ്ഞു പോകുന്നു.

വടക്കോട്ട് പാഞ്ഞുപോയ കാറ്റ്

ഒരിലയും നുള്ളി

തിരികെ വന്ന്

അവളെ കോരിയെടുത്ത്

തെക്കോട്ട് പറന്നുപോകുന്നു.

"എത്രയും പ്രിയപ്പെട്ടവളേ,"

പാതിരാവിൽ

കത്തു കിട്ടുമ്പോൾ 

പനിച്ചൂടിൽ വെന്തുപാകമായിരുന്നു.

വിറയ്ക്കുന്ന വിരലുകളിൽ

വിറതീണ്ടിയിട്ടില്ലാത്ത അക്ഷരങ്ങൾ.

"പൂർത്തിയായിരിക്കുന്നു,

നീ പറഞ്ഞതുപോലെ,എല്ലാം.

നക്ഷത്രങ്ങൾ വിരിയുന്നതും പൊഴിയുന്നതും

അടുത്തുകാണണമെന്ന മോഹം,

അങ്ങനൊരിടം,

നിനക്കേറെയിഷ്ടമാകും.

നാലു ജനാലകൾ,

ചുവരിനെ 

കണ്ണാടിയോ കലണ്ടറോ

ഘടികാരമോ കുത്തിനോവിച്ചിട്ടില്ല.

നിനക്ക് നിന്നിലേയ്ക്കെത്തിനോക്കാൻ

തെളിനീരുപാകിയ കിണർവട്ടം,

അതും നീ പറഞ്ഞിരുന്നു.

പിന്നെ................."

അടഞ്ഞുപോകുന്ന കണ്ണുകളിലേക്ക്

ഒഴുകിവരുന്ന വരികളിൽ

നിവർത്തിവെച്ചിരിക്കുന്ന 

ഇഷ്ടങ്ങളുടെ പട്ടിക.

അക്ഷരത്തെറ്റില്ലാത്ത 

അതിമനോഹരമായ കൈപ്പട,

ഒരിക്കൽമാത്രം പറഞ്ഞുകേട്ടതിൽ

ഒരു തരിപോലും 

ഊർന്നുപോകാത്ത ഓർമ്മ.  

പണിതീർത്തിരിക്കുന്നു,

എന്റെ ഒറ്റമുറി മേട.

സംശയമൊട്ടുമില്ല,

പഠിച്ച ക്ലാസ്സുകളിലെല്ലാം

ഒന്നാമനായിരിന്നിരിക്കുമിവൻ,

ദൈവം.

പൊട്ടിവീണ 

ഊഞ്ഞാലിന്

ആയം തുന്നുന്ന- 

റ്റുപോയ വിരലുകൾ.

പൊഴിഞ്ഞുവീണ 

നിഴലുകളിൽ 

നിവർന്നു നിൽക്കുന്നാകാശം.

നിലംപറ്റിയ ഓർമ്മയുടെ

മുറിവൂതിയൂതി 

മണ്ണു കുടഞ്ഞുകളഞ്ഞ് 

കുരുക്കിടുന്നു കാറ്റ്.

സ്വന്തം 

കണ്ണുകളെപ്പോലും

വിശ്വസിക്കരുതെന്ന്.

കണ്ടതാ,

ആ വട്ട മുഖം.

ആരും കാണാതെ

മൂടി വെച്ചു.

ആദ്യം വീഞ്ഞപ്പെട്ടി 

പിന്നെ

ക്രമത്തിലോരോന്ന്.

എന്തു ചെയ്തിട്ടെന്താ.

ഭാരം കുറഞ്ഞുപോയോ-

ന്നോർത്ത്  

തട്ടിൻ പുറത്തൂന്ന്

പുളിയിട്ടു മിനുക്കാൻ

താഴേക്കെടുത്തു വെച്ച 

ഓട്ടുരുളിയും.

ഓ..

കറുമ്പിക്കു വിളിക്കാൻ 

കണ്ട നേരം.

വയ്ക്കോൽ വലിച്ചുവെച്ച്‌

പുറത്തുതട്ടി പുന്നാരിച്ച്‌

രണ്ടു കാലികൾക്ക്

ഒരുമിച്ചു കാടി കുടിക്കാൻ 

തികയുന്ന

ചരുവവുമെടുത്തു 

വന്നപ്പോഴേക്ക്

കാണാതായിരിക്ക്ണു.

ആരോ  

കൂട്ടിക്കൊണ്ടു പോയീന്ന് 

സാരിത്തുമ്പു വലിച്ചു പിടിച്ച്

പിറകേ സുന്ദരിപ്പൂച്ച.

ഉണക്കാനിടുന്ന

നെല്ലിനും കൊപ്രയ്ക്കും 

നിഴലു വിരിക്കാൻ 

മുടീം അഴിച്ചിട്ടു 

വരുമ്പൊഴൊക്കെ

പായ മടക്കി,

പത്തായപ്പുരയിൽ വെച്ച്, 

എത്ര ലോഹ്യത്തിലാരുന്നു

മുറ്റത്തെ പടിക്കെട്ടിൽ

ഞങ്ങള് 

മിണ്ടിപ്പറഞ്ഞിരിക്കാറ്.

കൊണ്ടുപോയതാ,

തലമുടിക്കുള്ളിലൊളിപ്പിച്ച്. 

പണ്ടാരോ പറഞ്ഞത്,

എത്ര നേരാ..!

കളിക്കാൻ   

ആകാശത്തിന് 

പമ്പരമുണ്ടാക്കി,

കഴിക്കാൻ  

ഭൂമിക്ക് 

മണ്ണപ്പവും ചുട്ടുവെച്ച്,  

മുഖം നോക്കാൻ 

പുഴയിലിറങ്ങിയ  

നേരത്താണ്

പുഴയ്ക്ക് ദാഹിച്ചതും

അവൾ

എന്നെയങ്ങപ്പാടേ  

കോരിക്കുടിച്ചതും.

മുറ്റം നിറഞ്ഞ്

വെയിൽ പെറ്റുകൂട്ടിയ

നിഴൽക്കുഞ്ഞുങ്ങൾ,

അലിഞ്ഞു മായാൻ 

മഴയെത്തുന്നതും

കാത്തു കാത്ത്.

പൊള്ളുന്ന വെയിലുടുത്ത

നേരത്താവാം 

അമ്മയെന്നെ പെറ്റിട്ടത്,

അതുകൊണ്ടുതന്നെയാവാം 

തിരിച്ചറിയാനാവാത്ത വിധം

അത്രമേൽ

ഞാനുമിവരെപ്പോലെ

മണ്ണിലിങ്ങനെ.

സ്വപ്നമായ് 

നീ മായ്ച്ചുകളഞ്ഞത്,

കാണാത്തൊരിടമായിരുന്നു  

ഓർക്കുന്നില്ലെന്ന്    

പകലിനോടാണയിട്ട്  

ഇരുട്ടെന്നു പേരുവിളിച്ചത്.

മുറിഞ്ഞ രേഖകൊണ്ട്

ഞാനെന്റെ പുറംകൈയിൽ

പതിയെ നുള്ളിനോക്കുന്നു.

അടുക്കളയിലെ

പല പല നിറങ്ങളിട്ടുവെച്ച

ചില്ലുഭരണികളിൽ,

മുറ്റത്തെ

നിറഞ്ഞുകവിയുന്ന

മണങ്ങളിൽ,

വെയിൽ 

ചുണ്ടു നനയ്ക്കുന്ന 

വിയർപ്പുതുള്ളികളിൽ,

നിരത്തിവെച്ച

വാക്കിന്റെ കൂട്ടങ്ങളിൽ,

കാറ്റൂയലാടുന്ന ജനാലക്കൊളുത്തുകളിൽ,

കാണുന്നില്ലയെന്നെ.

അത്രയും ഇഷ്ടത്തോടെ

നീ 

ഉമ്മവെച്ചുപോയ നെറ്റിയിൽ

തരിശായിക്കിടക്കുന്നു 

ഞാനെന്ന ഭൂമിക.

പലവട്ടം 

വരച്ചു മരിച്ചിട്ടും

ഒരു 'വട്ടം

വരയ്ക്കാൻ കഴിയാത്ത

ജീവിതം, 

ഇല്ലാതെപോയ  

വിരലുകൾ വിടർത്തി

പതിയെ

മറ്റാരും കേൾക്കാതെ

മരണത്തോട് ചോദിക്കുന്നു,

'ഞാൻ മരിച്ചാൽ നീ കരയുമോ?'

നിൽപ്പ്,

അതേ നോട്ടം 

അതേ ഇടം 

അതേ കുപ്പായം

നീ.

കണ്ണിനുള്ളിൽ 

തിളങ്ങുന്ന സൂര്യൻ,

കരയുമ്പൊഴും

ചിരിക്കുമ്പൊഴും

മങ്ങാതെ

മറയാതെ

മങ്ങിയ വെളിച്ചത്തിലും.

തിരയടങ്ങാത്ത കടൽ

നെഞ്ചിനുമീതെ.

കൈ നീട്ടിയൊന്ന് 

പൊതിഞ്ഞുപിടിച്ചാലോ. 

ഞെട്ടറ്റുവീണ വാക്കുകൾ

അടക്കം ചെയ്തിട്ടെന്നപോലെ 

വിടരാത്ത ചുണ്ടുകൾ.

വിരൽനീട്ടിയൊന്ന് 

തൊട്ടുനോക്കാമായിരുന്നു.

നീയൊന്നനങ്ങിയോ.

ദേ,

ജനാലവിരി മാറ്റാൻ

ഇരുട്ട് വരുന്നുണ്ട് 

അവളോടൊരു കീറത്തുണി

ചോദിച്ചുവാങ്ങട്ടെ

ഈ നിലക്കണ്ണാടിയൊന്ന്

തുടച്ചുമിനുക്കണം.

പുര 

കെട്ടി,മേഞ്ഞു,

മഞ്ഞു പൂത്തുകൊഴിയുന്ന  

മരത്തിനു താഴെ.

വരച്ചിട്ടു,

തെളിനീരിൽ മുക്കിയെടുത്ത് 

നീളത്തിലൊരു പുഴ.

കാററിന്,

വളളിനിറഞ്ഞ്

പൂക്കുന്നൊരൂഞ്ഞാൽ.

വിയർത്തുവരുമ്പോൾ

പിഞ്ഞാണം നിറയെ

ഊതിയാററിയ കഞ്ഞി,

പകലിന്.

വെളളത്തിനു പോയ

വെയിലിനും

തുണിപെറുക്കാൻ പോയ

മഴയ്ക്കും

തളർന്നു വരുന്നേരം

ചാഞ്ഞു മയങ്ങാൻ 

മെഴുകിയ മണ്ണിന്റെ വരാന്ത.

നൂർത്തിവിരിച്ചിട്ട പുൽപ്പായ

നിലാവിനും.

കത്തിച്ചു വെച്ച 

മിന്നാമിന്നിവെട്ടത്തിൽ

മുടിയുടക്കറുത്ത്

വാരിക്കെട്ടിവെച്ച്,

ഒററയ്ക്കിരുന്ന്

തീരാത്ത കഥയുടെ വിത്തുകൾ 

കുടഞ്ഞുപെറുക്കുന്നു  

നക്ഷത്രക്കമ്മലിട്ടൊരു

കറുത്ത പെണ്ണ്.

ഞാൻ

എന്ന വാക്ക്     

നീ

എന്ന പൊരുളിനെ       

അതിന്റെ 

ഉറവിടത്തിൽ നിന്ന്  

ചുംബിച്ചെടുക്കുന്നതിന്റെ   

ഒച്ച,

ഒരു മരം  

വേരുകളാഴ്ത്തി

ആഴം കൊണ്ട് 

അതിന്റെ

ആകാശത്തെ

മണ്ണിടത്തിൽ നിന്ന്

തൊട്ടെടുക്കുന്നതുപോലെ.

സ്വപ്നങ്ങൾ നിർമ്മിക്കുന്ന

ഒരുവളിലേക്കായിരുന്നു 

അവസാനമായി 

ഞാനൊരു യാത്രപോയത്.

കാൽവിരൽ കുത്തി

അവൾ 

അനായാസമായി

കടലിനെ കരയാക്കി നടക്കും.

മേഘങ്ങളെ ആട്ടിൻപറ്റങ്ങളാക്കി

ആകാശച്ചെരുവിലൂടെ

മേച്ചുനടക്കുമ്പോൾ

അവളൊരു മാലാഖയെപ്പോലെ.

സ്വപ്നങ്ങളും പേറി

വരിവരിയായി നടന്നുപോകുന്ന

ഉറുമ്പുകൾക്ക്

അവൾ

ഈർക്കിൽതുമ്പുകൊണ്ട് വഴികാട്ടും.

നിലാവിനെ നിർമ്മിക്കാൻ

അവൾക്കൊരൊറ്റ പിച്ചകപ്പൂവിതൾ

ആ നേരത്ത് 

അവളുടെ വിരൽത്തുമ്പുകൾ

കൂടുതൽകൂടുതൽ നേർത്തുവരും

നിലാവതിൽ പറ്റിപ്പിടിച്ചിരിക്കും.

നനുനനുത്ത ഓർമ്മകളുടെ

ചൂട്ടും കത്തിച്ചുപിടിച്ച് 

അവൾ 

രാപ്പാലം കടക്കാനൊരുങ്ങുമ്പോൾ 

നക്ഷത്രങ്ങളൊരുമിച്ചുകൂടിനിന്ന്

കണ്ണുചിമ്മും.

തിരികെപ്പോരാനൊരുങ്ങി,

ചിരിക്കുന്ന സൂര്യനെക്കെട്ടിയ

പൊട്ടാത്ത ചരട് 

അവളെന്റെനേർക്ക് നീട്ടി

എന്റെ വിരൽത്തുമ്പിലിരുന്ന്

അവൻ ചില്ലകൾക്കു മുകളിലൂടെ

പച്ചയിലകളെയുരുമ്മിയുരുമ്മി പറന്നുനടക്കുന്നതും

ഇരുട്ടുപരക്കുന്നതിനു മുമ്പ്

എന്റെ തലമുടിച്ചാർത്തിനുള്ളിൽ

ഓടിവന്നൊളിക്കുന്നതും

ഞാനൊന്നു കണ്ടു, കണ്ണുകളടച്ച്.

താഴേക്കിറങ്ങിനിന്ന്

ചരടു പിടിക്കുന്ന നേരത്ത്

എന്റെ വിരൽത്തുമ്പുകളും

അവളുടേതുപോലെ നേർത്തുനേർത്ത്..!

ഉടലഴിച്ച്

വെട്ടം പുരട്ടി

'നിറമേത് നാളെ...'

നഖം കടിച്ച്

കാൽവിരൽ തൊട്ട്

വട്ടം വരയ്ക്കുന്നു ഭൂമി.

'കടുത്ത പച്ചയിൽ

വിളഞ്ഞ മഞ്ഞ'

പുതപ്പു മാറ്റി

കുടഞ്ഞെണീറ്റ്

ചിരിച്ചു മായുന്നു മഞ്ഞ്.

തിളച്ച്

തൂവിയെങ്കിൽ

ഒരു വറ്റുകൊണ്ട്

വയർ നിറഞ്ഞേനെ.

കനലില്ലാത്ത നാവ് 

ഒതുക്കിപ്പിടിച്ച്

കനമുള്ളൊരു

നോവടുപ്പ്.

 

ചുവരിൽ തട്ടി 

തലയിടിച്ചുവീണ്

കിതപ്പാറ്റുന്ന കാറ്റ്.

കമിഴ്ന്നുറങ്ങുന്ന

കലത്തിന്റെ

വായറ്റത്തിന് 

ചിലയ്ക്കാനാവില്ലെന്ന്

വാലുമുറിച്ചിട്ട്

ഉത്തരത്തിലൊരു പല്ലി.

കഥ കേൾക്കാൻ

ഒരുറക്കവും

വാശിപിടിക്കുന്നില്ലെന്ന്

ഒറ്റയ്ക്കിരുന്നു

കണ്ണു തുടച്ച്

വായന മതിയാക്കുന്നു,

കരിഞ്ഞ മണമുള്ള രാത്രി.

ഓർമ്മയുടെ

ഒരു കണമിപ്പൊഴും

വറ്റാതിരിക്കുന്നതു-

കൊണ്ടാവാം

പകലറുതി വരയ്ക്കുന്ന

സൂചികളുടെയറ്റത്തു നിന്ന്

സെക്കൻഡിന്റെ മുനകൊണ്ട്

നീയെന്നെ തൊട്ടു വിളിച്ച്

കടന്നു പോകുന്നത്.

അതുകൊണ്ട്,

അതുകൊണ്ടു മാത്രമാണ്'

വിചിത്രമായൊരു ചിത്രമായ്

ഞാനെന്നെ വരഞ്ഞ് 

ഇരുളൊച്ചയുടെ മൂശയിൽ

മിനുക്കിയെടുത്ത്

നാളെയെന്നു വെളിച്ചപ്പെടുന്നത്.!

നിറഞ്ഞു നിറഞ്ഞ്

കടലാകുമ്പോൾ,

മുന്നിലുള്ളതൊക്കെ

മാഞ്ഞുപോകുമ്പോൾ

വിരല് മടക്കി മടക്കി 

തിരകളെയെണ്ണാൻ തുടങ്ങും.

തെറ്റിപ്പോയി തെറ്റീപ്പോയീന്ന്

ആർത്തുചിരിച്ചവർ 

കര നനച്ചിറങ്ങിപ്പോകും.

വിരല് കുഴയുമ്പോൾ 

കടല് കാണാത്തൊരുവൾ

മുകളീന്നിറങ്ങിവരും

ഒക്കത്തും

മുന്നിലും പിറകിലുമായി 

മുലകുടി മാറാത്തവരും  

ഇത്തിരി വളർന്നവരും  

കുറേപ്പേർ.

കണ്ണെഴുതാൻ  

ഓരോരുത്തരെയായി

മുന്നിലേക്ക് നിർത്തിത്തരും 

മഷിച്ചെപ്പ് തുറക്കുമ്പൊഴേക്കും 

ഇമ്മിണി വെട്ടത്തിൽ

മാഞ്ഞുപോയതൊക്കെ

തെളിഞ്ഞുവരും.

കടല് വറ്റും.

ഇരുട്ടിന്റെ

പിഞ്ഞാണത്തിൽനിന്ന്

തെറിച്ചുവീഴുന്നു 

വറ്റുകളായ് 

നക്ഷത്രങ്ങൾ.

വിശപ്പ് വിശപ്പെന്ന്,

കുമ്പിളുമായ് 

പിടഞ്ഞെഴുന്നേൽക്കുന്നു

സന്ധ്യയോളം തളർന്ന്, 

മയങ്ങിവീണ കിനാവുകൾ.

തട്ടിക്കൂട്ടി

ഉണക്കിവെയ്ക്കും,

രാവും പകലും

മുറതെറ്റാതെ.

പതിരല്ല പതിരല്ലെന്ന്

തൂവൽ പൊതിയും

മുറ്റം കാക്കുന്ന 

കിളയനക്കങ്ങൾ.

നീയാണെന്റെ രാജ്യമെന്ന്

മുന കൂർപ്പിച്ച്  

വരഞ്ഞു വരഞ്ഞ്

മൂർച്ചപ്പെട്ടതാണെന്റെയീ  

മുറിവടയാളങ്ങൾ.

പച്ചയായൊരു

പെരും നോവിനെ    

മടിയിലുറക്കി    

മരവിച്ചിരിക്കെ 

ഇടനെഞ്ചിലൊരു 

പുഴകുത്തുന്ന 

വണ്ടേ,

രഥവേഗം

മുറിയുന്ന വഴിയിൽ 

വിരലായ് മുളയ്ക്കുമെന്ന്   

തുളുമ്പിനിറയുന്നു 

ആഴത്തിലിരുന്നൊരു 

വാക്കിന്റെ വട്ടം.

വരാന്തയിൽ 

ചുരുണ്ടുകൂടിക്കിടക്കുന്നു 

വിശന്നു വലഞ്ഞ  

വെയിൽ,

പാളിനോക്കുന്ന കാറ്റിന്റെ 

പതിഞ്ഞ മുരടനക്കം,

അടർന്നുവീഴുന്ന

മഞ്ഞച്ച ആകാശങ്ങളുടെ

പതിഞ്ഞ തേങ്ങൽ,

എന്നോ മറഞ്ഞുപോയ 

കാലടികളിൽ തട്ടി

കമഴ്ന്നുകിടക്കുന്നു മുറ്റം,

വിരൽത്തുമ്പുകൊണ്ട് 

തൊട്ടടുക്കാൻ പോലുമാ-

വാത്തവിധം

മാഞ്ഞുപോയിരിക്കുന്നു

വീടിന്റെ നിഴൽ.

 

ആഴമാകാൻ 

നേർത്തുനേർത്ത് 

പടരുന്നതും 

ആകാശമാകാൻ  

ഉയരമറിയാതെ    

പറക്കുന്നതും  

നീയെന്നെ 

ചേർത്തുപിടിക്കു-

മെന്നുറപ്പുള്ളതുകൊണ്ടു-

മാത്രമാണ്,

ഒരു പച്ചത്തഴപ്പിനെ

മണ്ണെന്നപോലെ.

ബധിരമാണ്

നിന്റെ 

രാപകലുകളെങ്കിൽ,

എനിക്കെന്തിനാണൊച്ച...

മൂകയായിരിക്കണമൊരു-

ശംഖിനുള്ളിൽ,

നീ ഊതിയെന്നെയൊരു- 

നാദമാക്കുംവരെ.

ദിനക്കുറിപ്പുകളിൽ

എന്നും കോറിയിടുന്നത്

'ഇരുട്ട്'.

മേശമേലെടുത്തുവെക്കുന്ന

ഇരുട്ടു നിറച്ച മൺഭരണി,

ചുവരിൽ ചാരിവെക്കുന്ന

ഇരുട്ടിൽനിന്നിരുട്ടിലേക്കുള്ള

ഗോവണി,

കോർത്തുപിടിച്ചു കയറാൻ 

ഇരുട്ടിന്റെ വിരലുകൾ, 

പൊത്തുകളിൽ നിന്ന്

കിനാക്കൾ ചിറകു കുടഞ്ഞ് 

പറന്നുയരുന്നതിന്റെയൊച്ചകൾ.

നക്ഷത്രങ്ങൾ 

ഗർഭത്തിനുള്ളിലിരിക്കുന്ന 

രാജ്യം,

ഇരുട്ട് പൂക്കുമിടം 

ഹാ ! ഇതെന്റെ രാജ്യം,

ഇരുട്ടിന്റെയും.

മുറിയാത്ത വാക്കും 

പൊട്ടാത്ത നേരും 

ചുറ്റിമുറുക്കി 

എത്ര വെണ്മയോടെയാണ്

ആഴത്തിലാണ്ടുപോയ 

ഞാനെന്ന ഭാരത്തെ

നീ നിന്റെ വിരൽത്തുമ്പിലെ

അപ്പൂപ്പൻതാടിയാക്കുന്നത്,

ഉൾക്കരുത്തുള്ളൊരു

ഖലാസിയെപ്പോലെ.

നക്ഷത്രങ്ങളുടെ 

വിരൽത്തുമ്പ്  

തിരയുന്നുച്ചവെയിൽ.

ഒരു പകലിനെ

ഉരുക്കിയെടുത്താൽ

സൗരയൂഥങ്ങൾ

എത്രയെണ്ണം 

മെനഞ്ഞെടുക്കാമെന്ന്

മലമുകളിൽ

ഉറക്കമില്ലാതിരുന്നൂ-

തിച്ചുവക്കുന്നു

ഒറ്റയ്ക്കിരുന്നൊരാല.

ഇരുട്ടു പൂക്കുന്നിടത്ത് 

കനൽപെറ്റു-

പെറ്റുതിരുമെന്ന് 

മണ്ണടരുകൾ വകഞ്ഞ്  

കാറ്റിന്റെയൊച്ച.

കാറ്റെടുത്ത്

പിന്നെ മഴയെടുത്ത്,

പുക മൂടിമൂടി 

കറുത്തത്.

വായിച്ചെടുത്തില്ല

ജനാലകൾ,

യാത്രയിലൊരിക്കലും.

ആകാശമെടുത്ത്   

കടലു മുക്കി

ഭൂമിയോളമുരുട്ടിയെഴുതി 

കിനാവ് നാട്ടിവെച്ച    

പിളരാത്ത പലക.

പിന്നിലേ- 

ക്കോടിമറയുന്ന  

വഴിപ്പച്ചകളുടെ 

കാതിലെ കൂടു'കളിൽ 

ഒളിപ്പിച്ചുവെക്കും   

കരിനീലക്കല്ലുകൾ.

ഇടയ്ക്കിടെ       

നിലാവും കത്തിച്ചു-

പിടിച്ചൊരു നടപ്പാണ്.

ഒരെണ്ണവും 

കളവുപോയിട്ടില്ലാ-

യെന്നുറപ്പുവരുത്താൻ.

പുലർച്ചക്ക്  

കാതുകുത്താനെത്തും

മഞ്ഞ്.

ഇത് 

ആകാശമെന്നും

ഇത് 

കടലെന്നും

ഒന്നൊന്നായ്  

പതിച്ചുവെച്ച്,  

അവൾക്കു കൊടുക്കണം 

ചന്തം തികഞ്ഞ 

പതിനാലലിക്കത്തുകൾ.

കടലേ,

തിരയെന്നെഴുതുന്നേരം 

നിനക്കെന്തിനാണിത്രയുമൊച്ച. 

കേൾക്കാം,

തിരകൾക്കുമുകളിലൂടെ 

ഒരുവൾ നടന്നുപോയതിന്റെ, 

മരുന്നുമണമുള്ള ഉടൽ  

വലിച്ചെറിഞ്ഞതിന്റെ,

ആഴക്കടലിലൊരു 

പുര കെട്ടി മേഞ്ഞതിന്റെ, 

മൺചട്ടിയിൽ ഉപ്പുപരലിട്ട് മീൻകഴുകിയെടുക്കുന്നതിന്റെ,

വിളിച്ചിട്ടില്ലാത്ത എന്റെ പേര് 

ഇടയ്ക്കിടെയങ്ങനെ 

തൊണ്ടയിൽ കുരുങ്ങുന്നതിന്റെ,,

നിലയ്ക്കാത്ത ഒച്ചകൾ.

കാണാനാവും,

എന്നെ പെറ്റ ആ വയറിലെ 

നോവിന്റെ  

മായാത്ത അടയാളം.

 

ഉറക്കെ

വിളിക്കണമെന്നുണ്ട്  

ജനിച്ച തീയതിയും നക്ഷത്രവും

മറവിയെ ഊട്ടിയൂട്ടി നിറയ്ക്കുന്ന

സന്ധ്യകളിൽ ഉരുവിടുന്ന 

ആ പേര്.

ഇപ്പോഴുമുണ്ട് 

അലമാരയുടെ,

മേശയുടെ

വാതിലിന്റെ മറവുകളിൽ

കണ്ണീർ പൊഴിച്ചിട്ട 

കുഞ്ഞുനേരങ്ങളുടെ

ആഴത്തിലുള്ള മുറിവുകളുടെ

ഉണങ്ങാത്ത വിടവുകൾ.

ഞാനിതുവരെ  

കണ്ടിട്ടേയില്ല,

ഒരു കഥയിലോ കവിതയിലോ,

കടലെന്ന് വായിക്കുന്നേരം 

കരകവിയുന്ന എന്നെ.

പഴകിയൊരോർമ്മ നനച്ച് 

കണ്ണിലൊരു കാട് വളർത്തുന്നവളെ.

(ജീവിതത്തെ ഇങ്ങനല്ലാതെങ്ങനെ

എഴുതാൻ.)

 

ഒറ്റയ്ക്ക്

ഒരക്ഷരമാകുന്ന 

നേരങ്ങളിലാണ്

പേറ്റുനോവിനോടൊപ്പം 

കുടിയിറക്കപ്പെട്ട എന്റെ പേരിനെ

രണ്ടായി പകുത്ത് മുലയൂട്ടുക.

ഒറ്റ ശ്വാസം കൊണ്ട് 

പലയാവർത്തി വിളിക്കുക,

കൺവെട്ടത്തിൽ നിന്ന്

മറഞ്ഞുനിൽക്കുന്ന കുഞ്ഞിനെ-

യെന്നതു പോലെ.

ഉമ്മറത്തിരുന്നാൽ കാണാം

വീട് നട്ടു പിടിപ്പിച്ച

രണ്ടു മരങ്ങൾ തളിർത്തും പൂത്തും

തല നിറഞ്ഞ്, 

നിറങ്ങളുതിർത്തിട്ടങ്ങനെ.

വിരലോടിച്ചു നോക്കും

തലയിലൊന്നും തടയില്ല, 

നുള്ളിയെടുക്കാനൊരീരു പോലും.

 

മെല്ലെ ചിറകനക്കി,

അടയിരിക്കുമാകാശത്തെ 

തൊട്ടുവിളിച്ച്

തിരിതാഴ്ത്തിവെച്ചൂ-

ന്നൊരു പേച്ച്.

വട്ടം കറങ്ങുന്ന 

നിലാക്കുരുന്നിനെ

വാരിയെടുത്ത് 

തലതോർത്തിയൊരുക്കി

തേനും വയമ്പും

പിന്നെ 

നുണയാനൊരീണവും

കൊടുത്തിട്ടുവേണം

രാവിന്റെ മാറിൽ

കൺപീലികൾകൊണ്ടെ-

നിക്കൊരു ചിത്രം വരയ്ക്കാൻ.

ഒരേയൊ-

രാകാശമെന്ന് 

ഒരിലയിൽ പകുത്ത്

നിഴൽ വിരിച്ചിട്ട് 

പാട്ട് വിളമ്പി 

ഒരേ ചിറകെന്ന് 

തൂവൽ മിനുക്കി  

കേൾക്കാത്ത കഥയിൽ

ഉറക്കം പുതച്ച് 

ഞാൻ നീയാകുന്നു 

നീയതിന്റെ പച്ചയും.

ആദ്യക്ഷരം  

ഒരു തൂവൽപോലെ

മിനുക്കിയെടുത്താണ്   

നീയെന്നെയെന്നും  

നീട്ടി വിളിക്കാറ്.

മിച്ചം വരുന്നതെടുത്ത് 

അടുക്കളയിലെ

ഉപ്പുഭരണിക്കും

പിന്നെ 

കൈയെത്തിപ്പിടിച്ച്

ഉറിക്കുമായി 

വീതിച്ചു കൊടുത്ത്   

ഞാനതിനൊപ്പം പറന്ന് 

ആകാശം കാക്കുന്നൊരു  

കിളിയാകും

നീന്തിത്തുടിക്കും.

മഴ 'കൊണ്ടും

വെയിൽ 'നനഞ്ഞും

ഉയരത്തിലുയരത്തിൽ.

പറന്നിറങ്ങി 

പാതിരായ്ക്കുറങ്ങാൻ 

പായവിരിക്കുന്ന നേരത്താണ് 

അക്ഷരങ്ങളൊന്നായ് ചേർന്ന് 

എന്റെ പേരിലേക്കിറങ്ങിക്കിടക്കുക.

ചുറ്റിനും,

കാറിത്തെളിയുന്ന

ചീവീടുകൾ.

തോരാനിട്ട 

ഇരുൾമണികൾ

മുറ്റം നിറയെ.

നനുത്ത കാറ്റിന്റെ 

തുഞ്ചത്തിരുന്ന്,  

നേർത്തവിരലാൽ   

വെളിച്ചത്തിന്റെ തരികൾ 

വിതറിയിടുന്നാരോ..!

ഒരു..........

ഒരു തൂവൽക്കിനാവുപോലെ.

 

മിന്നാമിനുങ്ങിന്റെ

ഒരു തരി വെട്ടം

പാട്ടിന്റെ ഒരു വരിശ

കൊറിക്കാൻ

ഒരു കടലമണി

നനയാൻ ഒരു തിര

അലിയാൻ ഒരു വാക്ക് 

ഹാ !

എന്തൊരിരമ്പം

മണ്ണ് പൂത്തുലയുന്നതാവാം !!!

വെളിച്ചം

വെളിച്ചമെന്ന് 

പാതിപാടിയൊരീണം

കുടഞ്ഞിട്ട് 

മുടികെട്ടിവെച്ച് 

മഷിയെഴുത്ത് മായ്ക്കുന്നു  

കറുത്ത മേഘങ്ങൾ.

പൊട്ടിച്ചിതറി

വീണുകിടക്കുന്നു 

വാതിൽപ്പടിയിൽ

നിലാവിന്റെ ചില്ലുകൾ.

മുറിഞ്ഞ കാറ്റിന്റെ 

അടക്കിയ തേങ്ങൽ.

നനഞ്ഞ രാവിന്റെ  

കീറിയ കുപ്പായം

തുന്നിക്കൂട്ടി 

വീണ്ടും തുന്നിക്കൂട്ടി 

പാടിത്തളരുന്നു  

രാക്കിളികൾ.

ജനാലയിൽ

വെളിച്ചത്തിന് 

വാതിലുകൾ

വരയ്ക്കുന്നു 

വെയിൽ,

തോരാതെ.

പുകയുണങ്ങിയ 

കറുപ്പിൽ

തെളിഞ്ഞുവരുന്നു   

ഇത്തിരിപ്പോന്ന 

ഒരു വര. 

കിനാവു തൊട്ട് 

ഉടൽ മിനുക്കുന്നു

ചുവരുകൾ

മായാതെ.

ചിരിച്ചും

പിന്നെ കരഞ്ഞും

പരസ്പരമറിയില്ലെന്ന്

മൗനം പുതച്ച്

വാചാലരായവരുടെ

ഉറങ്ങാനറിയാത്ത

വീടുകൾ.

പല പല

തരംഗാവൃത്തികളിൽ

പലരായ്

പലതായ് വിളിക്കപ്പെട്ട

ചുവരെഴുത്തുകൾ

പതിഞ്ഞ

ദേശവഴികൾ.

ചുണ്ടുകളും

നഖങ്ങളും 

ആഴ്ന്നാഴ്ന്നിറങ്ങി 

ചിറകറ്റുവീഴുന്ന

ഇരവുപകലറുതികൾ.

കനലെരിയുന്ന 

മണ്ണായ്  

എഴുതപ്പെടുന്നു,

ഒരേ ലിപിയിൽ 

ഞാനും നീയുമിരുന്ന

നമ്മളെന്ന രാജ്യം.

ഇരുട്ടിനെ 

എഴുതുമ്പൊഴും 

കനലു പോൽ 

അത്രമേൽ  

ചുവക്കുന്നെന്റെ

വിരലുകൾ.

നീയെന്നെഴുതുമ്പൊഴും

തളിർക്കുന്നു

പച്ച ഞരമ്പുകൾ

ഉയിരറ്റയിലകളിൽ.

''വിശക്കുന്നു....

നീ വിയർക്കുന്ന     

പെരുംനുണ.

നിന്റെ അത്താഴത്തിന്   

കറിക്കൂട്ടൊരുക്കെ,

ചെമന്നതാണ് 

നിലാവേ,

എന്റെ രാത്രിയുടെ 

നേർത്ത വിരലുകൾ.

കുഴികുത്തി 

മൂടിയിട്ടിരുന്ന   

വെയിലിന്റെയൊരു 

കഷണം

ചികഞ്ഞെടുത്ത്

ചുവരിനൊരു ജനാല 

വരച്ച്.

ഇരുട്ടെത്തും,

ജനലഴികൾക്ക് 

ചായം പുരട്ടാൻ.

വെട്ടം പിടിച്ച്  

കൂട്ടിനിരിക്കുന്ന 

നിലാവിനും കൊടുക്കണം

കോരിവെച്ചിരുന്ന    

കുറുകിയ കിനാവിന്റെ

ഒരു നുള്ളു മധുരം.

ഒരിടവഴിയോ

ഒരു ചെറുതണലോ 

കാത്തുനിൽക്കാനില്ലാത്ത 

കനൽയാത്ര.

ബോഗിക്കുള്ളിൽ

അടക്കംചെയ്യപ്പെട്ട

നിശ്വാസളുടേതുപോലെ 

പുറത്ത്

ചിറകുമടക്കിയ കാറ്റ്.

ഉത്തരത്തിന്

കാത്തുനിൽക്കാതെ,

കാൽകുഴഞ്ഞു വീഴുമെന്ന

ഉറപ്പിന്മേൽ  

വലിച്ചെറിയപ്പെട്ട ചോദ്യങ്ങളുടെ 

അണയാത്ത

ചിത.

വെന്തുനീറുന്നു  

ഞാൻ കോർത്തൊരുക്കിയ 

വാക്കിന്റെ പച്ച.

ശേഷം , അവൾ
മണ്ണിനു മുകളിലൊരു
റോസാപ്പൂവ് കുത്തിനിർത്തി

ചുവന്ന തിരുവസ്ത്രത്തിൽനിന്ന്

പുറത്തുകടക്കുന്നു.

ആകാശം ഉണങ്ങാനിട്ട,
രാത്രിയുടെ കടുംനിറത്തിലുള്ള
കുപ്പായങ്ങളിലൊന്ന്

പാകം നോക്കി 

എടുത്തണിയുന്നു.
കടവും തോണിയും

ദിക്കറിയാതെ 
ഒരുമിച്ചുതുഴഞ്ഞുപോയ
ജലമറ്റ പുഴയുടെ
നെഞ്ചിലേയ്ക്കു നടന്നിറങ്ങി 
അവൾ രണ്ടായി പിളർന്ന്
ഒഴുകാൻ തുടങ്ങുന്നു.

വാക്കിൽ-

നിന്നക്ഷരങ്ങൾ 

വീണുടയുന്നതിന്റെ

ഒച്ച.

ചുണ്ടു വിട്ടൊരു ചിരി

താഴെവീണ്

പൊട്ടി ചിതറി 

മാഞ്ഞുപോകുന്നതുപോലെ.   

ചിറകായ് മുളയ്ക്കുന്ന 

വാക്കേ, 

ഞാനാ വേഗത്തിന്റെ

നിഴൽ മാഞ്ഞൊടുങ്ങിയ 

കറുത്ത മണ്ണ്.

അയയിൽ 

തൂക്കിയിട്ടിരിക്കുന്ന  

കുപ്പായങ്ങളിൽ

ഇരുട്ട് തുന്നിയെടുത്ത 

കടുത്ത നിറത്തിലേത്,

കാറ്റിന്റെ വിരൽ വിടുവിച്ച് 

അവളെനിക്കു നീട്ടുന്നു.

വെയിൽ 

കുത്തിക്കീറിയ മാറിടം

ഞാനെന്റെ കൈകൾ  

വിടർത്തി

മറച്ചു പിടിക്കുന്നു.

കിളിയിരുന്ന ചില്ലകളിൽ

ആരോ കൊളുത്തിയ   

തിരികളുടെ

ചുവന്ന പൊട്ടുപോലുള്ള

തിരുശേഷിപ്പുകൾ.

തിരിഞ്ഞു നോക്കാതെ

നടക്കണമെന്നവൾ.

പേരു വിളിക്കുമ്പോൾ

മറന്നുപോകാതിരിക്കാൻ

ഞാനെന്റെ പേര്

ചുവടുകളിലെണ്ണിയെണ്ണി  

രാവിലും കറുത്തൊരു 

രാവായ്.......

 

തൊട്ടുനോക്കി,

മഞ്ഞിന്റെ തണുപ്പ്.

വിരലുകൾ വിരലുകളെന്ന്

ചിതറിയോടിയും     

വന്നും പോയും 

ഇടയിലൊരിത്തിരിനേരം 

നിന്നും 

വഴി പിരിഞ്ഞും  

വരിയാകുന്നുറുമ്പുകൾ. 

പിടഞ്ഞെഴുന്നേൽക്കുന്നു

കാറ്റ്. 

നാടാകെ   

ചൂടോടെ വിളമ്പാൻ 

ഉറക്കച്ചടവോടെ 

താള് തിരഞ്ഞ്.

അതിലതിവേഗം

എടുത്തുവെയ്ക്കുന്നു,

അങ്ങോട്ടിങ്ങോട്ട് 

ഉറുമ്പുകൾ

ഒച്ച താഴ്ത്തിയും

മൂക്കത്ത് വിരൽവെച്ചും 

വരയിട്ട് വരയിട്ട് 

കുറുകിയ ഒരു വരി  

'തീണ്ടിയത് കിനാവാണെന്ന്.'

അനന്തരം,  

മരണപ്പെട്ടവളുടെ  

വീടു തിരഞ്ഞ് 

നീ എത്തിയേക്കും.

വിരൽത്തുമ്പുകൊണ്ട്

പതിയെ തൊടണം, 

ആദ്യത്തെ തൂണിൽ.

ഒഴുകി വരും 

ഒരു പാട്ടിന്റെ നറുമണം 

പൊതിഞ്ഞെടുക്കണം

പൂവെന്നവണ്ണം

അടരാതെ.

രണ്ടാമത്തേതിൽ 

മിഴി തുറന്നുവരും

ഞാൻ പകർത്തിയ 

കാഴ്ചയുടെ തിരികൾ  

തൊട്ടെടുക്കണം 

മൺചെരാതെന്നവണ്ണം

അണയാതെ.

പതിയെ തൊടണം

അവസാനത്തേതിൽ 

പെയ്തിറങ്ങിവരും 

ഞാനെന്ന ഒറ്റവരി

കോരിയെടുക്കണം 

മഴയെന്നവണ്ണം 

തോരാതെ.   

തിരികെ നടക്കുന്നേരം 

മുറ്റത്തു ചിരിക്കുന്ന 

മുക്കുറ്റി 

നിന്നെ പേരുചൊല്ലി വിളിക്കും.

ഒരു നിമിഷം

നോക്കി,നിൽക്കണം

എന്നിട്ട്   

കാതുകളാകാൻ മറന്നുപോയ

കഥയെ കണ്ടെടുക്കാൻ 

വീണ്ടും വരുമെന്നവളോട്   

രഹസ്യമായൊരു   

കളവ് പറഞ്ഞേക്കണം.

 

ചിക്കിയും

തോർത്തിയും 

ഉണക്കാനിട്ടതാണ് 

മുറ്റം നിറയെ 

വെയിലിനെ.

ഒരു ഞൊടിയിട.!

വാരിയെടുത്തങ്ങ് 

കൊണ്ടുപോകുമ്പോൾ

മഴയ്ക്കോരായിരം 

വിരലുകൾ. 

നോക്കിയിരുപ്പിന്

കൂലിയായിട്ട് 

ഞാൻ 

നിനക്കൊരൂഞ്ഞാല  

കെട്ടിത്തന്നതാണല്ലോ  

കാറ്റേ..........

നന്നായ്   

മുറുക്കിപ്പിടിക്ക് 

എന്റെ  

വലംകൈയിൽ  

നിന്റെയാ വിരലുകൾ.

പെറുക്കിയെടുക്കണ-

മെനിക്കൊരു'വട്ടം'

എന്റെ 

കൈത്തണ്ട മുറിയുന്ന   

ചോരയിൽ നിന്ന്

സൂര്യന്റെ തിളക്കമുള്ള

ആ

ഉടയാത്ത വാക്കുകൾ.

 

രാവ്.....

നിലാചില്ലകൾ 

പെറുക്കിക്കൂട്ടിയിട്ട്  

തീ കായുന്നു.

ഇന്നലെ പെറ്റിട്ട 

നക്ഷത്രക്കുരുന്നിന് 

മുലകൊടുത്തുറക്കുന്നു

തുടുത്ത മേഘം.

ഇരുട്ടിനെയെത്ര 

കുടഞ്ഞിട്ടു നോക്കി,

എന്നിട്ടുമെന്നിട്ടും

കിനാവിനെയുടുപ്പിക്കാൻ  

മുറി വാക്കുപോലും

വീണു കിട്ടുന്നതേയില്ല. 

എനിക്കീ ഉറക്കത്തിന്റെ 

കുപ്പായമഴിച്ചുകൊടുക്കണം,

എന്നിട്ടു വേണം 

ഇരുട്ടറുതിക്ക് കനല് കൂട്ടാൻ.

എത്ര 

ചടുലമായ

മൗനത്തിലൂടെയാണ്

നീയെന്റെ വാക്കിൻകൂട്ടത്തെ 

ഒരൊറ്റ ചുവടുകൊണ്ട്

മുറിച്ചുകടക്കുന്നത്,

സമർത്ഥനായൊരു

മായാജാലക്കാരനെപ്പോലെ.!

'നാളെയെ

പണിയാനിടയില്ലാത്ത

നിന്റെ വിരലുകൾക്കെന്തിനൊരു

പാലമെ'ന്ന്

നീ മധുരമായെന്നോട്

പറഞ്ഞുപോകുന്നതു പോലെ.

ചോന്നിട്ടാണ് 

നീ വിരൽത്തുമ്പു തന്ന

ആ നാട്ടുവഴി,

അത്രയും 

വിയർത്തിട്ടില്ലിന്നേവരെ

ഒരു വാകയും.

 

പൊഴിയുന്നുണ്ട് 

നനുനനേയിന്നും 

നീ മൂളി നടന്ന പാട്ടിലെ  

ആ വരികൾ,

അത്രയും 

നനഞ്ഞിട്ടില്ലിന്നേവരെ

ഒരു മഴയും.

മൂക്ക് 

പിഴിഞ്ഞെറിഞ്ഞ്  

മുഖംവീർപ്പിക്കുന്നു   

നിലം മെഴുകി 

തളർന്ന നിലാവ്.

വരാതിരിക്കുന്ന-

തെങ്ങനെ 

മലയിറങ്ങിയിറങ്ങിയവൻ.    

കുപ്പായക്കീശയിൽ

ഒരു പൊതി കുപ്പിവളകൾ

കരുതാതിരിക്കുന്ന-

തെങ്ങനെ.

നീട്ടിയൊന്നു തുപ്പി   

ചൊക ചൊകേ  

ചോന്ന ചുണ്ട് 

തോർത്താതിരിക്കുന്ന-

തെങ്ങനെ. 

തലക്കെട്ടു കുടഞ്ഞ്  

ചേർത്തുപിടിച്ച്        

മെഴുക്കു തിരളുന്ന   

കൈകളിലേയ്ക്ക്       

തിരുകിവെയ്ക്കാതിരിക്കുന്ന-

തെങ്ങനെ, 

വിരിഞ്ഞ മഞ്ഞിന്റെ 

മൂക്കുത്തി.

ഉദയം

അസ്തമയം

നീ 

ഒരേ വിരലുകളാലത്  

തിരിച്ചും മറിച്ചും 

എഴുതിവെക്കുമ്പോൾ 

'എന്റെ ആകാശമേ'യെന്ന  

ഒറ്റ വായനയിൽ 

ചുവക്കുന്നെന്റെ ചുണ്ടുകൾ.  

.

നോവിന്റെ 

വേനൽച്ചൂടാൽ   

പൊള്ളുന്നു കിനാപ്പാടം.

കരിഞ്ഞേ പോയ്,    

പാറ്റി കൂട്ടിവെച്ച    

വാക്കിൻ മണിവിത്തുകൾ.

ഇല്ലൊരു നിലാമുറ്റം  

മൂളാനൊരു പഴംപാട്ടും.

ഒരുക്കുന്നു ശവമഞ്ചം

രാവിൻ നേർത്ത വിരലുകൾ.

വെയില് 

മോന്തിക്കുടിച്ച്

ബാക്കിവെച്ചിട്ടുപോയ   

തിണ്ണയിലെ തണുപ്പ്. 

നീട്ടിച്ചുമച്ചു തുപ്പിയ 

ഓർമ്മച്ചുവപ്പുകൾ. 

വിയർത്തൊലിച്ച പാടവുമായ്

ഒതുക്കുകല്ലുകൾ കയറി,

പൊട്ടിയ നഖത്തിലൂടെ

ചോരയുമൊലിപ്പിച്ച്

കിതച്ചെത്തുമിപ്പോൾ കാറ്റ്.

വിളയിച്ചുവെയ്ക്കണം

കഴിക്കാൻ ഒരു കിണ്ണമവലും

ഊതിക്കുടിക്കാൻ

ഒരു പാത്രം ചുക്കുകാപ്പിയും.

നിലാവുദിച്ച നേരം

പാട്ടിന്റെ തിരി താഴ്ത്തി

കിനാവേ,

നീ ഉറങ്ങാൻ കിടന്ന മാത്രയിൽ 

കെടുത്തിയതാണ് ഞാനെന്നെ.

ഒരൊറ്റ 

വാക്കിന്റെ  

പീലികൾ വിടർത്തി     

ചിക്കിയുണക്കുന്നു 

നീയെന്റെ     

നനഞ്ഞ പകലിൻ 

കവിൾത്തടം.

പൂക്കുന്നു 

ഒരൊറ്റ ഉമ്മയാൽ

വിടർന്ന് 

നിലാവ് ചൂടുന്ന  

രാവു പോൽ ഞാൻ.

 

വെറുതേ 

നുള്ളിനോക്കും 

കേൾക്കാം,

വേദനിക്കുന്നല്ലോയെന്ന് 

പതിയെ ഒരു മൂളൽ. 

തിണർത്തു വരും

ഒടുങ്ങാത്ത 

മരണങ്ങളുടെ പൊക്കിൾ-

ക്കൊടികൾ.

ജനലഴികളിലൂടെ 

ഇഴഞ്ഞിഴഞ്ഞെത്തും, 

പറന്നു പോയ കാറ്റിന്റെ 

ചിറകടിയൊച്ചയിൽ

പേടിച്ചരണ്ട് 

ചില്ലയിലമർന്നിരിക്കുന്ന     

തൂവൽ ഞരക്കങ്ങൾ.

ഞാനവളെ 

പൊതിഞ്ഞു പിടിക്കും,

പനിച്ചൂടു കൊണ്ട് 

വിറയ്ക്കുന്ന കുഞ്ഞിനെ 

എന്നതു പോലെ.

എന്നിട്ട് 

വിരൽത്തുമ്പിൽ 

പറ്റിപ്പിടിച്ചിരിക്കുന്ന

ഇത്തിരിപ്പോന്ന 

വെളിച്ചത്തിന്റെ പൊട്ടുകൾ 

അടർത്തിയെടുത്ത്

അകം മിനുക്കിക്കൊടുക്കും.

നിറവയറും താങ്ങി

ചാഞ്ഞു ചരിഞ്ഞിരുന്ന് 

നിലാവിന്റെ തൂണിൽ  

കിനാവു തൊട്ട് 

അവൾ  

വീണ്ടും   

വരയ്ക്കാൻ തുടങ്ങും      

പകലിനു മായ്ച്ചു കളിക്കാൻ 

മുറിഞ്ഞ-

വിരലു കൊണ്ടൊരു നഖചിത്രം.

വരിയാകാതെ

ചിതറിയ വാക്കുകളെ

മഞ്ഞിച്ച താളിലേക്ക്

ഒതുക്കിക്കിടത്തി 

പതിയെ 

സ്വപ്നത്തിലേക്ക്

കണ്ണുകളെ 

ഊതിക്കെടുത്തി,

കേട്ടു കേട്ട് കാതില്ലാതായ

കഥയിലെ കാര്യത്തിൽ 

ചാലുകൾ കുത്തുന്നു

രാവിന്റെ വിരലുകൾ.

ചുവരു നിറയെ

മരണപ്പെട്ട വീടുകളുടെ

ഞരമ്പിൽ നിന്നൊലിച്ചിറങ്ങിയ

ഉണങ്ങാത്ത ചോരയുടെ

വരയെഴുത്ത്.

ബ്ലാക്ക് ബോർഡ്,

വടിവൊത്ത അക്ഷരങ്ങൾ,

ഉടയാത്ത കോട്ടൺ സാരി,

രാവിലെ മുട്ടിന്മേലിരുന്ന്

ഞൊറിവുകൾ   

ഭംഗിയാക്കിക്കൊടുത്ത്    

തൊട്ടുനോക്കി തലോടിയ 

പൂക്കളുടെ ചിത്രത്തുന്നൽ.

മൂന്നാം നമ്പറിൽ

ഞാനിവിടെയുണ്ടെന്ന്  

തലകുനിച്ചു നിന്നിട്ട്

ഇരിക്കാൻ മറന്നുപോയ  

പെൺകുട്ടി. 

മാറ്റിവെയ്ക്കപ്പെട്ട

ഒരു അവയവമല്ല

മാറ്റിയെടുക്കപ്പെട്ടവളെന്ന്  

കനിവിന്റെ മുല കുടിച്ച,

ജനിച്ച ദിവസമേതെന്നറിയാത്ത,

അമ്മയെന്നെഴുതുന്നേരം

വിരൽ വിയർക്കുന്ന കുട്ടി.

എന്നെയൊന്നുകൂടി 

മുറുക്കിപ്പിടിച്ചുകൊണ്ട് 

ഒരു വട്ടം കൂടി ചോദിച്ചുനോക്കി

ഞാനെന്തേ മറ്റൊരു ദിവസത്തിൽ

ജനിച്ചില്ല.......

ഒറ്റയ്ക്ക്

ഒരു മണമാകുന്ന 

നേരങ്ങളിലാണ് 

എന്റെ വസന്തമേ

എന്നൊരുവൻ

നീട്ടി വിളിക്കുക.

ഒരു പൂമ്പാറ്റയിലേയ്ക്ക്

നിറങ്ങളടർത്തിയുടുത്ത്  

എന്റെ ആകാശമേ

എന്നു ഞാൻ 

ചിറകു വിടർത്തി

ഉയർന്നു പറക്കുക.

കാടും മേടും 

വിരൽത്തുമ്പു തൊട്ട്

പച്ചയെന്നൊരുണർവിൽ 

നിറങ്ങളഴിച്ചെടുത്ത്    

ഭൂമിക്ക് പുള്ളിപ്പാവാട

തുന്നുക.

മുടിപ്പിന്നലിനൊരു

മാല കോർക്കുക.

കാറ്റിനൊപ്പം 

ചിറകു താഴ്ത്തി പറന്ന്  

വീണ്ടുമൊരു ചില്ലയിൽ 

മണമാകുക.

കൂടെയുണ്ട്

എന്നൊരു വാക്കിന്റെ കൂട്ടിൽ 

കുറുകുന്നൊരു തൂവൽ പോലെ.

ഒറ്റയ്ക്ക്

ഒരു ദേശമാകുന്ന 

നേരങ്ങളിലാണ്

എഴുതി,

എഴുതി മായ്ച്ച്

മേഘങ്ങൾക്കൊപ്പം

പഠിക്കാനിരിക്കുക.

അസ്തമയത്തിന്,

ഉദയത്തിന്

ചുവരില്ലാതെ രാവെഴുത്ത്

നടത്തുക.

അലക്കുകല്ലിലെ

ഉടഞ്ഞ കുപ്പിവളയറ്റത്തെ

ഉണങ്ങിയ മുറിവുകൾ  

വായിച്ചു വായിച്ച് 

പെയ്തൊലിക്കുക.

നിറയാത്ത തൊഴുത്തിന്റെ

പേറ്റുനോവ് തലോടി

പുക വീശി കൂട്ടിരിക്കുക.

ഉന്മാദിയായ കാറ്റായ്

ചില്ലയിൽ നിന്ന്

ഉയിരറ്റ് വീഴുക,

ഗ്രഹങ്ങളുടെ ഭാഷയറിയാതെ

സൗരയൂഥത്തിലകപ്പെട്ട

മറ്റൊരു ഭൂമിയെപ്പോലെ.

എഴുതി  

മായ്ച്ചെഴുതി

മേഘങ്ങളെ 

അക്ഷരം പഠിപ്പിക്കുന്നു

ഒറ്റയായ് 

ഉന്മാദിയായൊരു ദേശം

പകലിരവിന്  

ലിപിയേതെന്നറിയാതെ 

ഉദയമെന്നെഴുതി

നക്ഷത്രങ്ങളുടെ നാട്ടിൽ

വഴിതെറ്റിയ സഞ്ചാരി.

ഗ്രഹങ്ങളുടെ 

ഭാഷയറിയാതെ

സൗരയൂഥത്തിലകപ്പെട്ട

ഇരുണ്ട ഒരു ഭൂമിയെപ്പോലെ.

അടുക്കിവെച്ച 

പോക്കുവെയിലിന്റെ

മടക്കുകളിൽ 

കത്തിത്തീരാത്ത 

വെളിച്ചത്തിന്റെ 

തരികൾ,

ചെമ്പരത്തിച്ചോട്ടിൽ 

കാറ്റിന്റെ

അഴിഞ്ഞുവീണ പാട്ട്,

പുരപ്പുറത്തേക്കു ചാഞ്ഞ്

പാതി പൊട്ടിയ

മണത്തിന്റെ അളുക്കുകൾ,

അകത്ത്

ചുരുട്ടിവെച്ച പുൽപ്പായയിൽ

തലവെച്ചു കിടക്കുന്നു 

കിനാവ് പോലെ

പുള്ളിയുടുപ്പിട്ട നിലാവ്.

 

കേൾക്കുന്നു,

ഞാനെന്ന വാക്ക്    

നീയെന്ന പൊരുളിനെ  

ഉയിരിടത്തിൽ നിന്ന്  

ചുംബിച്ചെടുക്കുന്നതിന്റെ   

ഒച്ച,

ഒരു മരം  

വേരുകളാഴ്ത്തി

ആഴം കൊണ്ട് 

അതിന്റെ

ആകാശത്തെ

മണ്ണിടത്തിൽ നിന്ന്

തൊട്ടെടുക്കുന്നതുപോലെ. 

രാവിന്റെ ചുവരിന്   

ചായമടിക്കുന്നതിന്റെ

തിരക്കിനിടയിൽ വെച്ചാണ് 

ഇന്നലെ ഞാൻ കണ്ട 

മുറിയാത്ത സ്വപ്നത്തെക്കുറിച്ച് 

അവനോട് പറയാൻ തുടങ്ങിയത്.

"നിറയെ നക്ഷത്രത്തുന്നൽ,

ആകാശത്തോളം 

വലിപ്പമുണ്ടായിരുന്നു

നമ്മുടെ പുതപ്പിന്,

പുഴക്കരയിൽ അണയാതെ 

കൊളുത്തിവെച്ച മൺചെരാത്.

ജനാലയിലൂടെ നീന്തി വന്ന്   

അഴിഞ്ഞുലഞ്ഞു കിടക്കുന്ന

നേർത്ത നിലാവെളിച്ചം, 

മുഖത്തേക്ക് പാറിവീഴുന്ന

കാറ്റിന്റെ മുടിയിഴകൾ,

ഓരോ ആവർത്തനത്തിലും

എണ്ണം തെറ്റിച്ചുകൊണ്ട്

ചിതറിക്കളിക്കുന്ന അക്ഷരങ്ങൾ

പോലെ 

രാവേറെയായിട്ടും 

ഉറങ്ങാതോടിക്കളിക്കുന്ന 

കുഞ്ഞു നിഴലുകൾ, 

നമ്മുടെ ചുണ്ടുകൾക്കിടയിൽ

പതിയുന്ന 

അവരുടെ വിരൽച്ചൂടിൽ.....

കറുപ്പിലും കറുപ്പായവൻ   

തിരക്കിന്റെ ചായക്കൂട്ടിലേക്ക്,

മുറിഞ്ഞ്.....

പുഴയിൽ വീണു കിടക്കുന്ന  

ചന്ദ്രന്റെ ഒരരിക് നുള്ളിയെടുത്ത്

വെളുപ്പിലും വെളുപ്പായൊരു പൂവ്

വരയ്ക്കാൻ  ഞാനും.....

രാക്കിളികൾ    

പാടാൻ തുടങ്ങുമ്പൊഴും  

നിന്റെ ഗന്ധത്തിന്റെ ചൂടിൽ

ഞാനൊരുണർവായ്  

വിയർത്തുകൊണ്ടേയിരിക്കും.

ഒരു കടുകുമണിവട്ടത്തിൽ

പൊള്ളിച്ചത്,

കത്തിമുനയിൽ ഇച്ചരിപ്പോന്ന

വര കോറിയിട്ടത്,

ഒരു തുള്ളി കൊണ്ട് 

മുറിവാകെ മധുരമിറ്റിച്ചത്, 

ഇനിയും പറഞ്ഞുതരാത്ത

രസക്കൂട്ടിൽ 

പിണക്കം നടിച്ചത്, 

ഒളിഞ്ഞുനോക്കരുതെന്ന്  

കാറ്റിനു നേരേ 

ജനൽപ്പാളി വലിച്ചടച്ചത്.... 

ഓർത്തോർത്തു കിടന്ന് 

നീയല്ലാതാരാ എനിക്കെന്ന്

മുഖത്തേക്ക് വിരൽ കുടയുന്ന 

നിന്റെ തണുപ്പിൽ 

രാത്രിയെ പുതപ്പിച്ചു കിടത്തും. 

ഒരാളലിലും 

കരിഞ്ഞുപോകാതെ, 

പ്രണയത്തിൽ    

പാകപ്പെട്ട നമ്മളെ  

വിളമ്പിവെക്കാനേതു വരിയെയാണ്

ഞാനീ കനലിൽ ചുട്ടെടുക്കുക.

ആർത്തിരമ്പ്ന്ന്  

ആകാശച്ചെരിവെന്ന്     

കോരിച്ചൊരിയ്ന്ന്     

ആഴക്കടലെന്ന്

പെയ്ത്.....

നിലാവും കൂട്ടി 

മുറുക്കി മുറുക്കി 

കിനാവരമ്പത്തിരുന്ന്,  

വെയിലിനിടാനൊരു 

മഞ്ഞുടുപ്പെന്ന്  

വെളുക്കുന്നു      

മഴവിരലുള്ളൊരു 

തുന്നൽക്കാരി.

വെളുപ്പായ്,

അംഗഭംഗത്തിന്റെ

തിരകളിൽ   

വീണലിഞ്ഞലിഞ്ഞ് 

ആകാശമായ് മാറിയ

കറുത്ത മേഘം പോലെ,

കാറ്റിന്റെ വിരൽ വിടുവിച്ച് 

മുളംതണ്ടിനുള്ളിൽ 

വീണുടഞ്ഞുപോയ 

പാട്ടിന്റെ വരിശകൾ പോലെ.

പേടിപ്പെടുത്തുന്നു

രാനേരങ്ങൾ.

ഇല പൊഴിഞ്ഞ ചില്ലയിലും

ഒളിച്ചിരിക്കും,

കൂർത്ത നഖമുനകളിൽ 

വരയ്ക്കാൻ കൂർപ്പിച്ചിറങ്ങി

ആരോ 

വരുമെന്നോർത്ത്. 

പൊത്തുകളിലൊളിപ്പിക്കും

ഞാനെന്റെ 

കീറിയ കുപ്പായത്തിനുള്ളിലെ

തുള വീണ കറുപ്പ്.

ഒരിക്കലും  

ഒരു പകലും 

വായിക്കാനെടുക്കില്ല   

വെയിൽ കുടിച്ചു കുടിച്ച്  

ഇരുട്ടായ് വിയർത്ത   

നേരിന്റെ ചരിത്രപുസ്തകം.

ഞാൻ വാക്ക് നഷ്ടപ്പെട്ട കുട്ടി'.

കിളിയേ,

നീ ചേർന്നിരുന്ന് 

ചുണ്ടനക്കാൻ തുടങ്ങുമ്പോൾ

കവിത'യെന്നു കേട്ട്

എന്റെ ചുണ്ടുകൾ വിറയ്ക്കാൻ

തുടങ്ങും.

അഴികളില്ലാത്ത ജനാലയിലൂടെ

ഒരു കാറ്റ് വീശിയടിക്കും,

അകമാകെ വാരിവലിച്ചിടും.

കഴുകിക്കമഴ്ത്തി 

മേൽമേലടുക്കിവെച്ച

മൺകലങ്ങളും മറിച്ചിട്ട്

വാതിൽ തള്ളിത്തുറന്നിറങ്ങിപ്പോകും,

വഴിയറിയുന്നവനെപ്പോലെ.

കിളിയേ,

എന്റെ നോവുകൾ 

അ(ട)ടുക്കിവെച്ച  

വരികളിൽ നിന്ന്

അടർത്തിയെടുത്ത്

മേഞ്ഞതാണ് ഞാനീ മേൽക്കൂര

ഞാൻ കുഴച്ച മണ്ണ്

ഞാൻ പടുത്ത പുര.

ഇത്, 

ഞാനെന്റെ കിനാവുമായി 

വേഴ്ച്ചപ്പെടുന്നിടം.

കുടിക്കാൻ ഒരു തുടം കടൽ,

കഴിക്കാൻ ഒരു കഴഞ്ചാകാശം,

കളിക്കാൻ ഒരു കുമ്പിളക്ഷരമണികൾ.

കിളിയേ,

നോവുപാടം കൊയ്ത്,

മെതിച്ച്,

ഉണക്കിയെടുത്ത്, 

പ്രാർത്ഥനയുടെ മുനകൊണ്ട്  

പുഴയായ്,

കാടായ്, 

പൂവായ്,

തേനായ്, 

പ്രണയമായ്.......

കൊത്തിയെടുത്തതാണ് 

എന്റെ മുറ്റം കടക്കാനറിയാത്ത

വരികൾ.

കിളിയേ,

കവിത ചോദിക്കരുതേ

ഇരുളുന്നു എന്റെ ആകാശം,

വെയിൽ,

നിറങ്ങൾ...... 

നോക്ക്,

അറ്റുവീണ വിരലുകളുടെ 

തുടിപ്പിൽ ചുവന്ന് 

ഒലിച്ചുപോകുന്നു എന്റെ പുര.

പുകച്ചുരുൾ 

വേഗങ്ങളിൽ 

ഇരുണ്ടു കറുത്ത്

കാറ്റിൽ ചിതറിത്തെറിച്ച് 

മഴയിൽ കുതിർന്ന്

നിലം പറ്റിയത്.

ഒരു യാത്രയുടെ കണ്ണുകളും 

വായിച്ചെടുത്തിരുന്നില്ല 

വളവിൽ നാട്ടിയ 

ഇച്ചിരിപ്പോന്ന വാക്കുകളുടെ

മിനുക്കപ്പെടാത്ത പലക.

കണ്ണുകളിലേക്ക്  

പാറിവീഴുന്ന

ഇരുണ്ട വഴികളെ    

നെറ്റിയിലൂടെ

പിന്നിലേയ്ക്കൊതുക്കി

വെക്കുന്നു

നനഞ്ഞ വിരൽതുമ്പുകൾ. 

കൂട്ടയിട്ട

ഓർമ്മച്ചീളുകൾക്കു മീതേ 

തീ പടർത്തിയിട്ട് 

വെളിച്ചം വെളിച്ചമെന്നൊ-

രാളലിൽ  

കാറ്റിന്

കനലൂട്ടുന്നിരുട്ട്.

ചക്രവാളത്തിൽ 

ആരോ നീട്ടിക്കെട്ടിയ 

കറുത്ത നൂലിന്റെ അയ.

പാറുന്നു, 

ഇറ്റുന്നയെന്റെ    

ചുവന്ന ചേല.

ഉരുക്കുന്നിരവ്

കടൽ കുടിച്ചാകാശം. 

ആരോ 

കൊളുത്തിവെക്കുന്നു 

ജനലരികത്ത് 

നക്ഷത്രവിരലുകൾ.

ഞാൻ 

ഇരുട്ട് വായിച്ചു വായിച്ച്

തിമിരപ്പെട്ട ഒരു വരി.

നിന്റെ

സ്വപ്നങ്ങളിലേയ്ക്ക്

എത്തിനോക്കുന്നു  

എന്റെ അടുക്കളവാതിൽ

നീ ഉമ്മ വെക്കുന്ന 

പിൻകഴുത്തിനോളം

വിടരാറില്ല 

ചുവക്കാറില്ല

മുറ്റത്തെ മണങ്ങൾ.

മുകളിൽ

ഏറ്റം മുകളിൽ

കൂടൊരുക്ക്ന്ന് കൂട്ടിനെന്ന്

കുറുകുന്നു 

മേഘരാഗച്ചില്ലയിൽ   

നനുനനുത്തൊരു 

നെഞ്ചകം.

പതിയെ പതിയെ  

ഒച്ചയൊന്നു മിനുക്കി

പറന്ന് 

പറന്നു പറന്നു പറന്ന്

ഞാനങ്ങ് മറഞ്ഞു പോയെങ്കിൽ.

ഒരിലയനക്കം

നീ വരുമെന്ന പാടലിൽ

നോവു കുടഞ്ഞ്

തളിർക്കുന്നെന്റെ ചില്ലകൾ.

ഇരുൾ തേവി

വെളിച്ചപ്പെട്ട വാക്കേ,

പച്ചയെന്നു വിയർക്കുന്നു

മൂക്കിൻ തുമ്പത്തിരുന്നെന്റെ 

ഓലക്കാൽക്കണ്ണട.