വരാന്തയിലേക്ക് കയറി 

തിട്ടയിലിരുന്ന് അസ്വസ്ഥതയോടെ 

കാലാട്ടിക്കൊണ്ടിരുന്നു 

കടുത്ത ചൂടിലായിരുന്നിന്നലെ.

താക്കോൽപ്പഴുതിലൂടെ 

ഞാനൊന്നു നോക്കി

ചുവരിൽ തൂക്കിയിട്ടിരിക്കുന്ന 

ഛായാപടങ്ങളിലേക്ക് 

നീണ്ടവിരലുകൾ പായിച്ചുകൊണ്ട്

പൊയ്പ്പോയ കാലങ്ങളെയവൻ ഓർത്തെടുക്കുകയായിരുന്നു

ഞാനൊന്നുകൂടി നോക്കി

കണ്ണുകൾ ചുവന്നിട്ടുണ്ടോ

മേലാസകലം വിയർത്തിട്ടുണ്ടോ.

തണൽകൊടുത്തും വീശിക്കൊടുത്തും 

മുറ്റത്തെ തെങ്ങോലകൾ 

യജമാനനോടുള്ള ആദരവുകാട്ടി       

താളമിട്ടു നിൽക്കുന്നുണ്ട്.

വാതിൽ തുറന്നു 

ഇപ്പൊ കണ്ടതേയുളളൂവെന്ന മട്ടിൽ 

ഊതിയാറ്റിയ കഞ്ഞിയും 

വൻപയറുപ്പേരിയും 

ചുട്ടപപ്പടോം ചമ്മന്തീം നിരത്തി

എന്തൊരു വിശപ്പ് എന്തൊരാക്രാന്തം.! 

ഞൊടിയിടകൊണ്ട് തീർത്തു.

ഉള്ളം നിറഞ്ഞു 

''വലിയവായൻ'' അറിയാതെ 

ഞാനൊന്ന് തുളുമ്പി.

 

ഓട്ടുപാത്രത്തിലെ വെളളമെടുത്ത് 

വായും കഴുകി 

സാരിത്തുമ്പു പിടിച്ച് 

കൈയും തുടച്ച് ഒരു കള്ളച്ചിരിയും.

ഇന്നലെയവൻ തന്നിട്ടുപോയതാണെന്റെ

പിൻകഴുത്തിലെ ഇമ്മിണി വല്യ 

കറുത്ത മറുക്.

___വെ(വി)യി(ര)ൽപ്പാട്_____