എനിക്ക് മുലയൂട്ടണം
ഒരു മറയുമില്ലാതെ
നിലാവുടുത്തിരിക്കുന്നവൾക്ക്
മറയെന്തിനു വേറെയെന്ന്
നിങ്ങൾ ചോദിച്ചേക്കാം
അത് നിങ്ങളുടെ യുക്തിക്ക് വിടുന്നു

എന്റെ ഭൂമികയിൽ
മുലബന്ധമററ്
ചോരചിന്തി മരിച്ചുവീണ
കുരുന്നുകൾ മാത്രം

മുലഞെട്ട് വായിൽവെച്ച്
കള്ളച്ചിരിയോടെ നോക്കുന്ന
ഓരോ കുരുന്നിന്റെ കാതിലും
ഞാനോരോരോ കഥകൾ പറയും
കഥയോരോന്നിലും
കേൾക്കുന്നവനാണ് രാജകുമാരൻ

നിരയിലെ അവസാനക്കാരനെ
കൈയിലെടുക്കുമ്പോൾ
ആദ്യമുണ്ടുറങ്ങിയവൻ
ഉണർന്നു കരയാൻ തുടങ്ങും

എനിക്കുറങ്ങണ്ട
ഒന്നു നിവർന്നിരിക്കാൻ
നീയെന്റെ പുരയ്ക്ക് തൂണാവണം.