ആ ചൂടിൽ,
നീ ചെറുതായെന്നെ
മുകളിലേയ്ക്കുയർത്തുമ്പോൾ
ആകാശമെനിക്കായ്
താഴ്ന്നിറങ്ങും.
ചിറകില്ലാന്നോർക്കാതെ
മേഘങ്ങൾക്കിടയിലൂടെ
ഞാനപ്പൊ പറക്കാനും.
പൊടുന്നനെ,
പൊടുന്നനെ അടർന്ന്
നിന്റെ കൈക്കുള്ളിലേക്ക്.
അരിമണികൾ
കൊത്തിത്തിന്നുന്നതിനിടയിൽ,
നീ ഏതുവിരൽകൊണ്ടാണ്
ആ സൂചി മറച്ചുപിടിച്ചിരിക്കുന്നതെന്ന്
പാളിനോക്കും.
ഓർക്കാപ്പുറത്തൊരു ദിവസം
ഉയരെ,
മേഘങ്ങൾ വകഞ്ഞ്
ഉയരേയ്ക്ക്.......
എനിക്ക് ചിറകു തുന്നാൻ
അവനെന്തിനാണൊരു സൂചി !
താഴെ,
ആ കൈ ഒരു ചെരാതു പോലെ..!
