പലരോടും

പറഞ്ഞിരുന്നു 

പല പല നേരങ്ങളിൽ,

മരിക്കുമ്പൊ കരയരുതെന്ന്. 

കേട്ടും കണ്ടുമറിഞ്ഞ ചിരി 

ഓർത്തെടുത്ത് പടർത്തണമെന്ന്. 

പറഞ്ഞിരുന്നു 

നോക്കിനിൽക്കരുതെന്ന് 

ചോരവറ്റിയ 

ചുണ്ടുകളിലേക്കും 

നിറംമങ്ങിയ  

വിരൽനഖങ്ങളിലേക്കും.

കാണുന്നുണ്ട് 

അടുക്കളച്ചുവരിൽ 

രണ്ടു നേർത്ത ജലരേഖകൾ.

സാരിത്തലപ്പുകൊണ്ടത് 

തുടച്ചുകൊടുക്കുന്ന, 

എന്റെയതേ ജന്മനക്ഷത്രമുള്ള 

ഒരുവളെയും. 

പറഞ്ഞിരുന്നതാണ് 

ഊട്ടിനിറച്ച രുചിഭേദങ്ങളോട്.....

ഒരു ചിരിയിലൂടെനിക്ക് തിരിച്ചുപോകണം