തിരശ്ശീലയ്ക്ക് പുറകിൽ 

ഒരു നിഴലായ് കണ്ടു എന്നത് നേര് 

തൊട്ടില്ല, 

അതിരില്ലാ പാടത്തിനപ്പുറമെന്ന് 

കേൾക്കാതെപോയൊരു

കൊയ്ത്തുപാട്ടിന്റെ കിനാച്ചരട് 

കെട്ടിയെന്നു മാത്രം

ഒരു അലയായ് കേട്ടു എന്നത് നേര് 

കരകാണാക്കടലിനക്കരെയെന്ന് 

പറയാതെപോയൊരു 

കഥയുടെ രസച്ചരട് 

അഴിച്ചുവെച്ചു എന്നു മാത്രം 

നിലാവലക്കിയ പുതപ്പിനുള്ളിൽ

കിനാവായ് വന്നെങ്കിലെന്ന് 

പലവട്ടം മോഹിച്ചു എന്നതും നേര് 

വന്നില്ല,

കുളിച്ചുകയറി വരുന്നേരം 

ജനലിനിപ്പുറം മറഞ്ഞ്

പാദങ്ങൾ നോക്കിനിന്നുവെന്നു മാത്രം. 

പടിയിറക്കിവിട്ടതാണ്.........

ഞാൻ, സ്മാർത്തവിചാരം ചെയ്യപ്പെട്ട 

ഒരു വാക്ക്.